Þura Gæjadóttir skrifar:
„Er eitthvað að?!!!“
Hjúkrunarkonan nánast hrópar þetta á mig. Mér verður um, held að ég sé komin með blóðnasir eða eitthvað þaðan af verra.
,,Þú lítur svo illa út“
„Já, það“ segi ég „æ, ég lít bara svona út“
Svona hófust samskipti milli mín og konunnar sem ætlaði að draga úr mér blóð í morgun. Það munaði minnstu að hún fengist ekki til að framkvæma blóðprufuna á þeim forsendum að ég liti svo illa út.
Eftir að ég náði að sannfæra hana um að ég væri ekki veik, ekki nýbúin að vera veik, ekki rosalega þreytt og ekki nýkomin af næturvakt, heldur væri ég bara svona náttúrulega ljót, þá tók hún prufuna.
Ég sagði við hana að kannski væri þetta því ég væri ekki máluð. Allavega hef ég aldrei fengið svona athugasemdir þegar ég er með maskara.
Af hverju er ég að ranta um þetta núna? Það hefur svo margoft komið fyrir að fólk heldur að ég sé veik eða þreytt þegar það eina sem „amar að“ er að ég er ómáluð. Vejulega hrökkva þessar athugasemdir af mér eins og vatn af gæs. En ekki í dag.
Í dag fór ég út í bíl eftir skoðunina, og ég og mín meðgöngukíló fórum að gráta.
En erum við svona vön því að sjá konur málaðar að okkur verður bilt við þegar við sjáum nakið andlit konu? Hvaða snyrtivörur notar þú á hverjum degi? Hvernig líður þér að fara út án þess?
En nú er ég búin að jafna mig og er bara hress með að vera með mitt allsbera smetti og nokkur veiðihár.
Pistillinn birtist fyrst á Facebook síðu Þuru.
