Á veturna birtast girnileg grasker í grænmetisdeildum verslana. Því miður er ræktun graskera ekki algeng á Íslandi, og þó að tilraunir hafi verið gerðar með ræktun í gróðurhúsum hafa afurðirnar ekki skilað sér í verslanir í neinum mæli. Graskerin sem við getum keypt hér á landi eru oftast innflutt frá Spáni eða Bretlandi.

Rófur eru hins vegar ræktaðar hér án nokkurra vandkvæða, en þær eru mögulega eitt vanmetnasta hráefni sem okkur stendur til boða. Löng hefð er fyrir notkun þeirra í kjötsúpur og rófustöppur, og mörgum finnst gott að naga þær hráar, en þar með er notkunin hér um bil upptalin.

Í þessum einfalda pastarétti er uppistaðan hunangshnetugrasker (e. butternut squash) og rófur. Rétturinn er eldaður í einum potti, svo uppvaskið er í lágmarki.

Auðvelt er að gera vegan útgáfu af réttinum – sjá innihaldsefni innan sviga!

Innihald:
50 g smjör eða smjörvi (V: ólífuolía)

4 smátt skornir skalotlaukar eða 1 gulur laukur

1 tsk. þurrkuð salvía

1 tsk. þurrkað rósmarín

2 bollar niðurskorið grasker (butternut)

1 bolli niðurskornar rófur

1 bolli grænmetissoð (1 teningur í sjóðandi vatn)

2 bollar nýmjólk (V: jurtamjólk)

11/2 bolli vatn

1 bolli rifinn parmesanostur (V: vegan „parmesenostur“)

1/4 tsk. negull

1 tsk. kanill

1 msk. púðursykur

2 tsk. salt

2 tsk. svartur nýmulinn pipar

Spaghettí fyrir fjóra (400–500 g)

Aðferð:
Bræðið smjörið í stórum potti, steikið laukinn og þurrkaða kryddið við miðlungsháan hita í nokkrar mínútur, bætið graskeri og rófum út í pottinn og steikið í 5 mínútur í viðbót. Hellið grænmetissoði út í, setjið lok á pottinn og látið malla í 15 mínútur. Stappið saman með kartöflustappara. Bætið mjólk, vatni, osti, sykri og kryddi í pottinn og hitið aftur að suðu. Bætið spaghettí út í og hrærið stöðugt á meðan það sýður í þann tíma sem gefinn er upp á pakkanum.

Berið fram með heilmiklu af rifnum parmesanosti og gómsætum ferskum kryddjurtum ef þær eru til í eldhúsinu.