Hægt væri að útrýma um helming alls krabbameins ef fólk myndi velja sér heilbrigðari lífsstíl. Þetta kemur fram í rannsókn vísindamanna við læknadeild Harvard háskóla í Bandaríkjunum.
„Ef fólk myndi hætta að reykja, halda sér hraustu og það fengi sér ekki fleiri en einn eða tvo áfenga drykki á dag myndi tíðni krabbameins snarminnka,“
segir vísindamaður við Harvard háskóla. Læknar hafa lengi sagt að óheilbrigður lífsstíll muni auka líkur á krabbameini verulega síðar á lífsleiðinni. Samkvæmt rannsókninni er aðeins ein af hverjum fimm konum og einn af hverjum fjórum mönnum sem fylgja þessu ráði.
Rúmlega 136.000 bandaríkjamenn tóku þátt í rannsókninni. Að sögn vísindamannanna myndi tíðni krabbameins lækka um 20 til 40 prósent ef fólk tæki upp heilbrigðari lífshætti.
Að mati vísindamannanna myndi tíðni lungnakrabbameins geta lækkað um 80 prósent ef að atriðunum sem nefnd voru hér fyrir ofan yrði fylgt. Sömuleiðis myndi tíðni ristilkrabbameins lækka um 30 prósent. Þá væri möguleiki á að lækka tíðni krabbameins í blöðruhálskirtli um 21 prósent og tíðni brjóstakrabbameins um tólf prósent.
