Út eru komnar Þín eigin saga – Búkolla og Þín eigin saga – Börn Loka eftir Ævar Þór Benediktsson og eru þær fyrstu léttlestrarbækur hans. Þær eru spunnar upp úr bókunum Þín eigin þjóðsaga og Þín eigin goðsaga en þær bækur hafa notið gríðarlegra vinsælda á undanförnum árum. Í bókunum er það lesandinn sem ræður ferðinni og meira en tíu mismunandi sögulok eru í hvorri bók um sig.
Með útgáfunni má segja að Ævar Þór standi fyllilega undir orðum sínum í helgarviðtali við DV: „búa til bækur sem eru vonandi nógu skemmtilegar, spennandi og áhugaverðar til að, ef ekki trompa símann, allavega sýna að bækurnar séu spennandi á allt annan hátt. „Þar býrðu til þinn eigin heim, þær ýta undir ímyndunaraflið og setja allt af stað. Það er nefnilega ekkert sem jafnast á við góða bók. Nema ef vera skyldi tvær góðar bækur.“
Bækurnar eru ætlaðar börnum sem eru að ná tökum á lestri og henta því fyrir börn á fyrstu stigum grunnskólans.
Evana Kisa myndskreytir bækurnar með fallegum litmyndum.
