Eyþór Ingi Gunnlaugsson hefur stofnað nýja hljómsveit ásamt félögum sínum, Rock Paper Sisters, og fyrsta lagið Howling Fool er komið út.

Sveitina skipa Eyþór Ingi sem syngur og spilar á gítar, Jón Björn Ríkarðsson (Jónbi Brain Police) sem spilar á trommur, Þorsteinn Árnason á bassa og Þórður Sigurðsson á hljómborð. Listamaðurinn Baldur Kristjáns tekinar myndirnar fyrir sveitina, sem er allt hluti af heildstæðu verki.

Í viðtali við Garg.is segir Þorsteinn frá tilurð bandsins í partýi á Dalvík og að annað lag sé tilbúið til útgáfu, auk nokkurra sem eru á demó stigi.

Að sögn Eyþórs Inga er markmiðið að hafa gaman af tónlistinni: „Við ræddum mikið um að maður væri alltof oft að ofhugsa hlutina þegar kemur að tónlist. Bönd eru lengi að vinna efnið og stundum hugsar maður of mikið. Er þetta eða hitt klisja eða ekki? Er þetta nógu gott? Er þetta nógu vel spilað eða nógu frumlegt? Við ræddum um að stofna band sem bara hittist á æfingu og semur einfaldlega áhyggjulaust rokk. Á fyrstu æfingunni varð lagið Howling Fool til. Á æfingu tvö tókum við það upp live, ekkert click-track og ekkert rugl. Við óverdöbbum að sjálfsögðu eitthvað en það er einhver svona over all fílingur sem skilar sér í upptökunni. Hugmyndin er að vinna þetta strax og gefa þetta út um leið.“