Í menningarannál ársins 2017 sem birtist í áramótablaði DV verður stiklað á stóru og rifjað upp það helsta sem átti sér stað í lista- og menningarheiminum á árinu sem er að líða. Leitað var til hóps álitsgjafa úr ýmsum kimum íslensks menningarlífs við gerð samantektarinnar. Daglega frá jólum og fram yfir þrettándann munu vangaveltur álitsgjafanna birtast í heild sinni á menningarsíðu DV.is. Þar líta þeir yfir árið, rifja upp það markverðasta og eftirminnilegasta í íslensku listalífi árið 2017 og greina stöðuna í menningunni í árslok.

Brynja Pétursdóttir danskennari

Brynja Pétursdóttir

Danskennari.

Hvað var eftirminnilegasta listaverk eða menningarafurð ársins 2017?

Í fyrsta lagi guð hjálpi mér og eitt það fyrsta sem ég gerði var að senda þessar spurningar á alla nákomna mér. Það sem ég hugsa mikið um er hvernig er hægt að skapa umhverfi eða aðstæður þar sem fólk upplifir eitthvað
eftirminnilegt saman. Mér þykir til dæmis Barnamenningarhátíð sem haldin er árlega í apríl alveg frábær viðburður, þar hefur skipuleggjendum tekist að búa til einstakan vettvang fyrir ungu kynslóðirnar okkar. Þar koma saman flestir 4. bekkingar landsins á setningarathöfn í Hörpu, þannig er tryggt að allir komist að. Þau fá svo að sjá söng, dans og leikverk sem vonandi fyllir þau innblæstri til að gera eitthvað skapandi sjálf. Þetta er einhver flottasta leiðin til að ýta undir og tryggja það að flóran af einstöku listafólki haldi áfram að blómstra á landinu okkar.

Hvað þótti þér markverðast í menningarlífinu á Íslandi á árinu?

Mér finnst gaman að sjá nýja viðburði poppa upp í Reykjavík, þegar eitthvað fer út fyrir kassann eins og sirkus, kabarett og dragsýningar. Sem betur fer er uppistand löngu farið að blómstra líka. Fyrir mér þá gerir þetta lífið mun bærilegra, það að geta hoppað á skemmtilega sýningu í borginni minni er alveg nauðsynlegt. Við hentum okkur í þetta og höldum nú árlega street-danssýningu sem vonandi bætir bara við nú þegar spennandi og ört stækkandi menningardagatal borgarinnar. En þetta tel ég vera mikilvægt fyrir samfélagið okkar, við þurfum að hittast, skemmta okkur saman, kynnast nýjum hlutum og stækka sjóndeildarhringinn. Það er einfaldasta leiðin til að ýta undir opið hugarfar, umburðarlyndi og góðan húmor! Það vill svo til að þeir eiginleikar auka almenna heilbrigða skynsemi sem vonandi flæðir á endanum yfir í gáfulegar ákvarðanatökur í kosningum, þátttöku í mikilvægum málefnum og svo framvegis. Þannig getum við byggt betur saman það samfélag sem okkur öllum líður vel í!

Mynd: Leifur Wilberg

Hvað finnst þér hafa einkennt menningarlífið/ -umræðuna á Íslandi árið 2017?

Stjórnmál, slæmar ákvarðanir hjá valdamesta fólkinu okkar og hvað við erum vanmáttug gagnvart því að farið sé illa með okkur. Það er búið að fara svo oft yfir þægindaþröskuldinn okkar, hlutir eru hættir að skipta máli og við gefumst bara upp. Ég vil ýta undir að fólk sé meðvitað í kringum mig, mig langar að gera betur hvað varðar að veita fólki innblástur til að nota gagnrýna hugsun og ég held að við getum öll grætt á því að gera það sama.