Leikarinn Shia LaBeouf hefur undanfarin ár verið að prófa sig áfram með gjörningalistaformið og nú hefur hann hafið fjögurra ára langan mótmælagjörning gegn Donald Trump fyrir utan Hreyfimyndasafnið í New York (e. Museum of the Moving Image).

LaBeouf hefur komið upp vefmyndavél á vegg fyrir utan safnið og mun hún streyma myndbandi á netinu næstu fjögur árin. Á vegginn fyrir ofan myndavélina stendur stórum stöfum: „He will not divide us“ og eru vegfarendur hvattir til að endurtaka þessar línur í myndavélina, eða bregðast við á hvern þann hátt sem þeir telja viðeigandi. Frá því að myndavélin var sett upp 20. janúar síðastliðinn hefur LaBeouf reglulega mætt á svæðið, kyrjað orðin endurtekið og aðrir vegfarendur oftar en ekki tekið undir.

Gjörningurinn hefur hins vegar vakið nokkur viðbrögð og hafa nýnasistar gert verkið að skotspón sínum, bæði á netinu og fyrir framan sjálfa myndavélina. Þeir hafa mætt og kyrjað sín eigin slagorð og ögrað öðrum gestur. LaBeouf var sjálfur handtekinn á miðvikudag eftir að hann lenti í handalögmálum við nasista fyrir utan safnið.

Hægt er að fylgjast með gjörningnum á vefslóðinni HeWillNotDivide.Us