Ninna Karla Katrínardóttir er um þessar mundir að gefa egg í annað skiptið. Hún er hvergi af baki dottin og segist ætla að halda áfram að gefa þar til hún má það ekki lengur. „Í fyrsta skiptið sem ég gaf egg þá bað vinkona mín mig um að gefa sér það. Ég hafði ætlað að gera þetta heillengi en aldrei gert neitt í því og dreif því loksins í því. Núna er ég að gefa í annað skipti og ég gef vegna þess að það er löng bið eftir eggjum og mig langar að hjálpa fólki að láta drauma sína um barneignir rætast,“ segir Ninna í viðtali við Bleikt.

Sjálf á hún tvær fullkomnar dætur og telur ólíklegt að hún muni sjálf eignast fleiri börn. „Ég lít þannig á þetta að ég á fjölda eggja sem ég hef engin not fyrir, ég er búin að eignast börn og ætla mjög líklega ekki að eiga fleiri svo ég vil að aðrir geti upplifað þetta dásamlega hlutverk sem er að verða foreldri,“ segir Ninna. Hún leyfir áhugasömum að fylgjast með meðferðinni á Snapchat undir notandanafninu: ninnakarla.