Guðjón Davíð Karlsson, betur þekktur sem Gói, hefur í nógu að snúast þessi misserin. Hann þótti sýna stjörnuleik í Risaeðlunum. Þá leikur Gói eitt aðalhlutverkanna í kvikmyndinni Lof mér að falla, en næst verður hægt að sjá hann í sýningunni Slá í gegn. En hvað segir pabbi um þennan upptekna mann, en faðir Góa er séra Karl Sigurbjörnsson biskup.

„Gói hefur alltaf verið einstakur gleðigjafi og góður drengur. Glaðsinna og ljúfur húmoristi, hreinn og beinn, heiðarlegur og samviskusamur. Ótrúlega vinnusamur og vandvirkur í öllu sem hann tekur sér fyrir hendur. Frjór og skapandi listamaður. Hann hefur miklu að miðla og á afar gott með að vinna með fólki. Hann er frábær kokkur og örlátur gestgjafi. Það hefur verið mikil gleði að fylgjast með því hvað hann sinnir vel fjölskyldunni sinni í öllum sínum miklu önnum. Ég er og hef alltaf verið mikið stoltur af honum.“