Árleg hátíð í Grímnes- og Grafningshreppi
Það var dásemda veður laugardaginn 12. ágúst síðastliðinn þegar Grímsævintýrin fóru fram á Borg. Nóg var í boði fyrir alla fjölskylduna: markaður, hoppukastalar og skemmtiatriði, auk tombólu kvenfélagsins en allur ágóði af henni rennur til góðgerðar- og líknarmála innanlands.
Einnig var markaður í íþróttahúsinu þar sem Kvenfélag Grímsneshrepps var með sinn sölubás með brauðum, bakkelsi og flottum sultum. Aðrir sölubásar voru með listaverkum, máluðum eða útskornum, ýmiskonar handprjóni og handavinnuvörum ásamt ýmsum öðrum vörum.
„Kvenfélagskonur Grímsnes- og Grafningshrepps hafa haldið tombóluna árlega frá árinu 1926,“ segir Laufey Guðmundsdóttir, formaður félagsins. Tombólan er því líklega ein sú lífseigasta á landinu. Mikil hefð hefur myndast af Tombólunni síðustu rúmlega 90 ár og gera margir sér sérstaka ferð ár hvert til að kaupa sér miða. Margir og fjölbreyttir vinningar voru í boði og engin núll. „Allur ágóðinn af tombólunni rennur til góðgerðar- og líknarmála innanlands og vilja kvenfélagskonur þakka þeim fjölmörgu sem styrktu málefnið með kaup á tombólumiðum. Hlökkum til að sjá alla aftur á Grímsævintýrum 11.ágúst 2018,“ segir Laufey.
Úti á íþróttavelli voru hoppukastalar og Hjálparsveitin Tintron með bílana sína til sýnis og Brunavarnir Árnessýslu mættu með slöngubíl þar sem krakkar gátu fengið að prófa að sprauta úr brunaslöngunni.
Á sviðinu mættu Einar einstaki töframaður sem lék listir sínar, Karítas Harpa Davíðsdóttir sigurvegari Voice á Íslandi tók nokkur lög, Leikfélagið Borg sýndi sýninguna Grímsævintýri, Tralli trúður mætti á svæðið.
Umhverfisnefnd Grímsnes- og Grafningshrepp afhenti umhverfisverðlaun sveitafélagsins 2017 en það var Kerhólsskóli, leik og grunnskóli sveitarinnar, sem hlaut verðlaunin í ár.
Mikil gleði og ánægja skein úr andliti barna og annarra á svæðinu eftir skemmtilegan dag og þess má geta að enginn aðgangseyrir er inn á svæðið eða í hoppukastalana.
