Alþjóðlegi Downs-dagurinn er haldinn í sjötta skiptið í dag
Í dag er alþjóðlegi Downs-dagurinn haldinn í sjötta skiptið. Sameinuðu þjóðirnar lýstu því formlega yfir árið 2011 að 21. mars væri alþjóðadagur Downs-heilkennis og með það að markmiði að auka vitund og minnka aðgreiningu. Dagsetningin er táknræn að því leiti að hún vísar til þess að Downs-heilkenni er orsakað af auka litning í litningi 21, þ.e. 3 eintök af litning 21 – 21.03.
Dagný Björt Axelsdóttir, 10 ára, ákvað að nota daginn til að fræða bekkjarfélaga sína í Salaskóla um Downs heilkenni en systir hennar, Bylgja Björt, er að sögn Danýjar. „4 ára snillingur og er með Downs heilkenni.“
Í samtali við DV segir móðir stúlknanna, Hildur Gottskálskdóttir, að yngri systir Dagnýjar sem er í öðrum bekk hafi einnig flutt fyrirlesturinn fyrir bekkinn sinn í dag. Þær vilji með þessu undirbúa krakkana í Salaskóla og fræða þau þar sem Bylgja byrjar í skólanum á næsta ári.
Hér að neðan má sjá fyrirlestur Dagnýjar um Downs Syndrome. Alþjóðlega Downs-deginum verður fagnað með samkomu í veislusal Þróttar, Laugardal, á milli klukkan 17 og 19 í dag.