Pasquale Cozzolino sem starfar sem yfirkokkur á veitingastað í New York fullyrðir að hann hafi náð að losa sig við 44 kíló á einu ári með því að borða 12 tommu margarítu pizzu í hádegismat á hverjum einasta degi. Segir hann að fólki eigi að ekki að koma nálægtum pillum og dufti ef það vilji grennast; ferskt fæði sé töframeðalið. Pizzan sem hann innbyrðir daglega er þó ekki af hefðbundnu tagi.

Þá segir að hann að meðfram að pizzuátinu hafi hann jafnframt tekið sælgæti og gosdrykki úr mataræðinu og byrjað að stunda kickbox tvisvar til þrisvar í viku. Það hafi gert honum kleift að losna við 30 sentimetra af mittismáli, sama stærð og pizzan sem hann fær sér daglega.

Það ætti ekki að koma á óvart að Cozzolino starfar sem yfirkokkur á pizzastað. Segist hann hafa bætt verulega á sig eftir að hann flutti til New York árið 2012 og byrjaði að vinna á veitingastöðum. „Ég gat hámað í mig heilan pakka af Oreo kexi á augabragði, það var eins og dóp fyrir mér. Auk þess þambaði ég tvær til þrjár flöskur af gosi á dag,“ segir hann en eftir að hafa fengið viðvörun frá lækni um að hann myndi að öllum líkindum fá hjartaáfall ef hann héldi uppteknum hætti ákvað Cozzolino að taka í taumana.

Pizzan sem hann fær sér daglega er þó ekki einsog þær sem finna má á hefðbundnum pizzastöðum. Deigið er aðeins úr vatni, hveiti, geri og salti og ofan á setur hann aðeins ferska tómatsósu, örlítið af mozarella osti og basil. Þá lætur hann deigið hefast í 36 klukkustundir áður en pizzan er bökuð og segir að á þann hátt megi minnka náttúrulegt sykurmagn og auka magn flókinna kolvetna. Pizzan sé því einungis um það bil 570 kaloríur og máltíðin afar mettandi.

Þá segist hann borða gróft morgunkorn og ávöxt í morgunmat, ávöxt í millimál og í kvöldmat snæði hann léttan sjávarrétt sem hann skoli niður með vínglasi. Pizzan góða sé þó uppistaðan í mataræðinu. „Þegar þú borðar pizzu þá þarftu ekkert annað,“ segir hann.