Breiðholtskirkja hyggst bjóða upp á svokallaðan „Drop-in skírnardag“ laugardaginn 28. maí næstkomandi. Foreldrar geta þá komið í kirkjuna með litlum fyrirvara og látið gefa börnum sínum nafn.

Skírnum hefur farið fækkandi undanfarin ár, samkvæmt tilkynningu frá kirkjunni, og spilar þar inn í mikið tilstand sem fylgir athöfninni og hár kostnaður sömuleiðis. Er þessi nýbreytni kirkjunnar liður í að sporna við þessari þróun.

Séra Þórhallur Heimisson, sóknarprestur í Breiðholtskirkju, mun annast allar athafnir þennan dag. Organisti kirkjunnar, Örn Magnússon, mun leika undir söng. Sönghópur mun syngja skírnarsálminn.

Ekki þarf að bóka skírnina, en gott er að láta vita með einhverjum fyrirvara svo enginn þurfi að bíða. Séra Þórhallur Heimisson, sóknarprestur veitir nánari upplýsingar í síma 891-7562.

Skírnarathafnir sem framkvæmdar eru á Drop-in skírnardeginum eru án endurgjalds og munu allir skírnarþegar fá áritað vottorð með sér heim í tilefni dagsins.

Að lokum kemur fram að ef vel tekst til þann 28. maí þá standi til að halda „Drop-in brúðkaupsdag“ í júní.