Einkaþjálfarinn og fjölmiðlamaðurinn Egill Einarsson segist vart hafa trúað sínum eigin augum þegar hann opnaði Fréttablaðið í gær. Rak hann augun í frétt þar sem greint var frá niðurstöðum skoðanakönnunar um vilja almennings að fá áfengi í matvöruverslanir.

„Gat það verið að meirihluti fólks vildi ekki sjá áfengi í matvöruverslunum? Hvaða fólk er þetta? Eini maðurinn sem ég þekki sem vill þetta ekki er Ófeigur félagi minn og það er samfylkingarrasshaus úr Hafnarfirði. Öllum öðrum líst mjög vel á þetta. Ég ákvað því bara að keyra í mína eigin könnun á Twitter,“ segir Egill á Facebook-síðu sinni en umræddur Ófeigur sem Egill vísar til er Ófeigur Friðriksson, bæjarfulltrúi Samfylkingarinnar í Hafnarfirði.

Egill segir að niðurstaða könnunarinnar sem hann framkvæmdi á Twitter hafi verið skýr.

„Fréttablaðið náði í 801 manns og alls tóku 90 prósent þeirra sem náðist í afstöðu til spurningarinnar. Hjá mér tóku 1446 manns þátt. Og niðurstöðurnar voru eins og ég bjóst við. Ég vissi að Fréttablaðið hafi verið að plata mann eitthvað í gær,“ segir Egill en niðurstöðurnar má sjá hér að ofan.