Keppnin Sterkasti maður Íslands verður haldin í dag (föstudag) og á morgun (laugardag). Keppt verður í dag í Thor Power Gym, Dalvegi, Kópavogi, kl. 17. Á morgun verður keppnin haldin Í Tryggvagarði á Selfossi og hefst þá kl. 13:30.

Meðal keppenda er kraftajötuninn og leikarinn frægi Hafþór Júlíus.

Keppnin Sterkasti maður Íslands á sér langa sögu og er hér um 40 ára afmælismót að ræða.

„Jón Páll hóf þennan feril að vissu leyti með því að dansa með Húsafellshelluna í Laugarhalshöll árið 1985 og það hreif landsmenn þvílíkt. Síðan hefur þessu verið haldið gangandi og það verða eflaust önnur 40 ár í viðbót. Jón Páll hitti landsmenn þarna í hjartastað sem áttuðu sig á því að við erum með kraftahefð hérna og þessi viðburðir gætu orðið vinsælir,“ segir Hjalti Árnason mótshaldari.

Á dögunum voru fréttir af því að 13 ára stúlka hafi lyft Húsafellshellunni. Hjalti hefur sínar efasemdir um það atvik en vill ekki útlista þær nánar. Hins vegar leggur hann fram áskorun:

„Ef það kemur 13 ára stelpa á mótið og lyftir hellunni þá skal ég persónulega greiða henni hálfa milljón króna,“ segir hann. Þessi áskorun er hér með orðin opinber.