Maðurinn var kominn með tíma inn á Vog. Hann pakkaði í tösku og Gunnar Ingi segir að hann hafi séð bros leika um varir mannsins í fyrsta skipti, hann sá að vonarneisti hafði kviknað hjá manninum en fljótlega slokknaði sá vonarneisti þegar SÁÁ tilkynnti manninum að hann mætti ekki fara í meðferð því hann hafi farið svo oft og þyrfti að bíða í tíu mánuði.
Maðurinn fór heim og segir Gunnar Ingi að bæði hann og maðurinn hafi vitað hvað væri fram undan. Í gær kom Gunnar Ingi að manninum meðvitundarlausum eftir að hafa sprautað sig með Ajax hreinsiefni, daginn áður hafði Gunnar Ingi verið í heimsókn hjá honum og tekið við hann viðtal, sem var birt rétt í morgun.
Gunnar Ingi er maðurinn á bak við átakið Lífið á biðlista sem hefur vakið mikla athygli. Átakið er herferð gegn löngum biðlistum í meðferð og afvötnun. Næstu þættir frá Lífinu á biðlista koma út í apríl, hægt er að fylgjast með átakinu á Facebook, Instagram og TikTok.
Frænka mannsins hafði samband við Gunnar Inga fyrir rúmlega tveimur vikum í von um að fá hjálp. Gunnari Inga tókst að sannfæra manninn um að fara á sjúkrahús, en hann var með svo svæsna sýkingu í hendinni að hún var þreföld að stærð. Fyrst ætlaði læknirinn að senda manninn heim og láta hann mæta daglega til að fá sýklalyf í æð en Gunnar Ingi steig þá inn í aðstæðurnar og útskýrði ástandið fyrir lækninum. Maðurinn var í kjölfarið lagður inn og var á bráðamóttökunni í viku, síðan var hann lagður inn á fíknigeðdeild og þar fékk hann þær fréttir að hann gæti farið samdægurs inn á Vog. Klukkustund áður en hann átti að vera mættur á Vog fékk hann símtal þar sem honum var tilkynnt að hann mætti ekki koma þar sem hann hafði farið svo oft í meðferð áður. Hann þarf að bíða í tíu mánuði.
„Þessi maður er bara að fara beint heim að sprauta sig,“ sagði Gunnar Ingi um helgina, þegar maðurinn var sendur heim. Hann hafði því miður rétt fyrir sér og hefur ástandið aðeins versnað.
„Eftir að ég fór frá honum í gær sprautaði hann sig með hreinsiefninu úr Ajax brúsanum sem sést [í myndbandinu]. Ég kom að honum í dag þar sem hann lá kylliflatur á þessu borði,“ segir Gunnar Ingi.
Í samtali við DV segir Gunnar Ingi að maðurinn hafi verið fluttur á bráðamóttöku og sé núna á geðdeild. „Þessi maður mun ekki lifa af tíu mánaða bið.“
„Ég vildi að þið gætuð séð sársaukann og tárin í augum hans. Það er erfitt að skilja hann, því miður,“ segir Gunnar Ingi.
„Stundum er ég bara að stinga mig út um allt og tjékka. Hversu galið er þetta? Af hverju er ég ekki að hætta? Af hverju get ég ekki fokking hætt?“ segir maðurinn í viðtalinu.
„Þú ert alltaf að fá síðasta [skammtinn], það er málið, þú þarft alltaf að fá síðasta.“
Horfðu á viðtalið hér að neðan.
Gunnar Ingi birti viðtalið með samþykki mannsins og frænku hans, sem hafði upphaflega samband við Gunnar.
