Rapparinn Nicki Minaj sýndi frá því í beinni útsendingu á Instagram er lögreglan handtók hana á flugvelli í Amsterdam. Rapparinn er grunuð um að hafa verið með fíkniefni í fórum sínum.

Á myndbandinu sýndi hún lögreglumann tilkynna henni að hún væri handtekin fyrir að vera með fíkniefni á sér og var rapparinn beðinn um að setjast upp í lögreglubíl svo hægt væri að flytja hana upp á lögreglustöð til yfirheyrslu.

Ekki hefur komið fram hvort rapparinn verði ákærð en lögreglan í Hollandi segir að Nicki hafi verið sektuð og svo fengið að halda áfram ferðalagi sínu.

Nicki neitar sök í myndbandinu og krefst þess að fá lögmann. Hún lætur loks undan og sest upp í bílinn.

Samkvæmt tilkynningu lögreglu var Nicki með það sem kallast væg fíkniefni í fórum sínum. Líklega er þar um að ræða efni sem eru lögleg í Hollandi en ólöglegt er að taka með sér yfir landamærin.

Annað myndband sem Nicki hefur birt sýnir hvar maður, líklega starfsmaður lögreglu eða flugvallarins, tilkynnir rapparanum að leita þurfi í farangri hennar því ónefndi maðurinn trúir því ekki að hann rapparinn sé ekki með meira á sér en það sem hún hafði gefið upp. Nicki segir að þar með hafi verið leitað í farangri hennar án hennar samþykkis og allt sé málið hið furðulegasta þar sem kannabis sé löglegt í Amsterdam, en þar með virðist rapparinn staðfesta að um kannabis hafi verið að ræða.

Hún vill meina að handtakan hafi verið samsæri til að tefja hana á tónleikaferðalagi sínu, en rapparinn var á leiðinni til Bretlands þar sem hún ætlaði að halda tónleika. Hún telur að fyrrverandi starfsmenn hennar sé á bak við þetta.

„Þau eru að fá vel greitt til að reyna að eyðileggja tónleikaferðalagið, svo margir eru reiðir yfir því hvað tónleikaröðinni gengur vel og að þeim tekst ekki að vera afætur á mér lengur. Ég stóð þau að verki að stela peningum frá ferðalögum mínum. Þau voru rekin. Urðu reið.“