Á miðvikudag greindi DV frá því að fastakúnni verslunarinnar Systur og makar í Síðumúla hefði farið ránshendi um verslunina og troðið varningi inn undir úlpuna sína en misst þýfið á leiðinni út úr versluninni.
Katla Hreiðarsdóttir, eigandi Systur og makar, er virk á samfélagsmiðlum og greindi hún frá því í Story á Instagram að hún væri orðlaus yfir athæfinu.
„Við erum í áfalli. Ég er svo reið. Þetta er manneskja sem ég hef afgreitt margoft niður í búð,“ segir Katla. Konan sé komin til ára sinna, haltrar við og notar staf en eiginmaður hennar leggur yfirleitt í stæði hreyfihamlaðra fyrir utan búðina. Starfsmenn verslunarinnar þekki konuna vel og segir Katla að stjanað hafi verið við hana í gegnum tíðina og hafi hún til að mynda verið aðstoðuð með vörur út í bíl. Segist Katla óttast að þetta hafi ekki verið í fyrsta sinn sem konan lætur greipar sópa um búðina. Segir Katla að konunni verði hér eftir meinaður aðgangur að versluninni og hyggst hún kæra athæfið til lögreglu.
Í gær greindi Katla frá því að konan hefði haft samband við sig og viðurkenndi konan að hún væri stelsjúk.
„Þetta er nú búinn að vera meiri dagurinn. Ég fékk símtal frá þessari, sem ég ræddi mikið um hér í gær. Ég er búin að fá gríðarlegt magn skilaboða sent,“ segir Katla og segir konuna hafa haft samband við sig og verið gjörsamlega miður sín.
„Og sagði að þetta væri allt saman stelsýki og hún réði ekkert við þetta. Og vildi greiða fyrir þetta einhvern veginn. Það er eitthvað verið að reyna að finna út úr þessu. Batnandi mönnum er best að lifa en ég get því miður ekki tekið á móti henni í versluninni aftur því þetta var ekki í eina skiptið og fórum við yfir þetta allt saman. En auðvitað er þetta leitt og það er auðvitað hrikalegt þegar þetta er orðið að einhverri fíkn. En það verður þó að vera í höndum viðkomandi að leita sér aðstoðar við þessu. Við vorum sammála um að hún panti bara á netinu ef hún treystir sér ekki í verslanir.“
