Laugardaginn 6. janúar klukkan 12 hefur göngu sína ný þáttaröð, Mamma, á hlaðvarpi mannlif.is. Kolbeinn Þorsteinsson, sonur Ástu Sigurðardóttur listakonu og Þorsteins frá Hamri, rifjar upp minningar sínar frá miklum umbrotatíma í ævi móður sinnar og varpar ljósi á baráttu hennar til að fá til sín aftur börnin sem frá henni voru tekin.

Margt hefur verið sagt um Ástu Sigurðardóttur, en oftar en ekki horft til þess sem hún skildi eftir sig á sviði lista. Móðirin Ásta hefur legið milli hluta, en það var hún þó sannarlega þótt oftast bæri þar skugga á.

Í hlaðvarpsþáttunum Mamma fjallar Kolbeinn af einlægni um líf hennar og þann tíma sem hann átti með móður sinni, stundum góðan og stundum slæman.