Leikarinn Matthew Perry átti sér þann draum helstan að eignast fjölskyldu áður en hann lést um helgina, 54 ára að aldri. Fjölmiðlar beggja vegna Atlantsála hafa teiknað upp mynd af lífi leikarans sem sló í gegn í gamanþáttunum Friends þar sem hann fór með hlutverk hins kaldhæðna Chandler Bing.
Heimildarmenn breska blaðsins Daily Mail segja að Perry hafi verið einmana undir það síðasta og þráð það að eignast konu og fjölskyldu – börn og síðar barnabörn.
Perry var ókvæntur og barnlaus þegar hann lést en hann hafði átt í þó nokkuð mörgum ástarsamböndum sem af ýmsum ástæðum gengu ekki upp. Hann var trúlofaður Molly Hurwitz en þau hættu saman árið 2021. Þá var hann með nokkrum þekktum leikkonum um tíma, til dæmis Juliu Roberts og Lizzy Caplan.
„Hann dreymdi alltaf um að eignast hina fullkomnu fjölskyldu,“ sagði heimildarmaður miðilsins. „Hann langaði í eiginkonu og að minnsta kosti tvö börn. Og hann talaði um að honum væri alveg sama þó hann myndi kynnast konu sem þegar ætti börn,“ bætti heimildarmaðurinn við.
Matthew var sjálfur býsna náinn stjúpföður sínum, sjónvarpsmanninum vinsæla Keith Morrison, en hann kvæntist móður Matthew, Suzanne, árið 1981.
Matthew lýsti því að Keith hefði alltaf komið fram við hann eins og hann væri hans eigin sonur. Matthew væri meira en reiðubúinn að taka á sig samskonar hlutverk og veita væntanlegum stjúpbörnum sömu ást og Keith veitti honum.
Heimildarmaður Daily Mail segir að Matthew hafi verið búinn að missa von um að finna ástina og þar af leiðandi verið orðinn leiður og þungur. „Hann deitaði margar konur en honum leið alltaf eins og þær hefðu bara áhuga á peningunum hans og frægð. Hann var mjög örlátur, gaf þeim flottar gjafir til þess eins að horfa svo á eftir þeim.“
Matthew glímdi við áfengis- og eiturlyfjafíkn og var honum vart hugað líf eftir alvarleg veikindi í fyrra. Ristillinn hans rofnaði vegna ofneyslu hans á ópíóíðum og varði hann löngum tíma á sjúkrahúsi í kjölfarið. Heimildarmaðurinn segir að aðstandendur leikarans hefðu talið að hans síðasta stund myndi senn renna upp, ýmislegt benti til þess að hann myndi tapa baráttu sinni.
„Við höfðum miklar áhyggjur af honum enda var hann í meira en mánuð á sjúkrahúsi. Hann léttist mikið og leit ekki vel út eftir þetta. En, einhvern veginn, eins og Matthew átti til, þá náði hann sér á strik aftur og hélt í vonina um að betri tímar væru handan við hornið. Það eina sem Matt vildi var að vera hamingjusamur en það er eins og hann hafi ekki leitað á réttum stöðum. Það er sorglegt að hugsa til þess að hann hafi dáið einn með engan við hlið sér.“
