Hank kom meðal annars fram í gestahlutverki í Friends-þáttunum sálugu þar sem hann lék kærasta Phoebe. Eignaðist hann afar náinn og góðan vin í Matthew Perry.
„Við vorum meira eins og bræður um langt skeið. Við drukkum mikið saman, hlógum mikið saman og vorum til staðar fyrir hvorn annan þegar við vorum að byrja í bransanum,“ sagði Hank í myndbandi á Instagram-síðu sinni um helgina.
Hank segir að mörgum þeirra sem voru nánir Matthew hafi liðið eins og þeir hefðu misst hann fyrir löngu vegna glímu hans við áfengi og fíkniefni.
„Ég hef verið edrú í 17 ár og verð að nefna það að í fyrsta skipti sem ég fór á AA-fund var Matthew með mér. Hann dró mig inn,“ sagði hann.
Þeir fóru saman á fundi í um eitt ár. „Hann var svo klár og gefandi og átti mjög stóran þátt í því að mér tókst að verða edrú. Ég vildi óska þess að hann hefði getað haldið sér á beinu brautinni.“
Hank segir erfitt að hugsa til þess að Matthew sé farinn. „Við söknum hans, söknum hans mikið. Þetta er eitt það skelfilega við þennan sjúkdóm, hann tekur þá sem maður elskar.“
