Margir spyrja sig hvort bölvun hvíli á málverki sem hefur verið til sölu í góðgerðaverslun í Hastings í Bretlandi.

Á stuttum tíma hafa tveir aðilar keypt málverkið og skilað því fljótlega því þeim þótti of hrollvekjandi að hafa það heima hjá sér. Báðir aðilarnir töluðu um að það væri eins og augu stúlkunnar á myndinni fylgdu þeim um herbergið. The Telegraph greinir frá málinu.

Það var miðaldra maður sem gaf versluninni málverkið sem síðan seldi það á 25 pund, eða um 4200 krónur.

Stuttu síðar kom viðskiptavinurinn aftur með málverkið og skilaði því, en krafðist ekki endurgreiðslu. Hann sagði að hann væri dauðhræddur við málverkið og vildi ekki hafa það lengur á heimilinu.

Steve, eigandi verslunarinnar, setti málverkið aftur í búðargluggann og auglýsti að það hvíldi hugsanlega bölvun á því. Markaðssetningin virkaði og var það keypt aftur, hins vegar var því fljótlega skilaðu aftur af konu sem „skalf af kvíða“ og sagðist aldrei vilja sjá þetta málverk aftur.

Málverkið var aftur sett í búðargluggann.

„Hún er komin aftur! Keypt tvisvar og skilað tvisvar. Ert þú nógu hugrakkur?“ skrifaði Steve í auglýsingu við málverkið.

Myndir af málverkinu hafa gengið eins og eldur í sinu um netheima. Eru augun að fylgja þér eftir?