Raunveruleikastjörnuhjónin Kyle Richards og Mauricio Umansky eru að skilja eftir 27 ára hjónaband.
Richards er ein af húsfreyjunum í geysivinsælu raunveruleikaþáttunum The Real Housewives of Beverly Hills.
Hún hefur verið í þáttunum frá fyrsta þætti, sem kom út í október 2010, og varð eiginmaður hennar, Umansky, snemma uppáhald áhorfenda.
„Kyle og Mauricio hafa verið skilin að borði og sæng í einhvern tíma núna en búa ennþá undir sama þaki,“ sagði heimildarmaður People.
„Það er friðsamlegt á milli þeirra á meðan þau ákveða næstu skref.“
Richards, 54 ára, og Umansky, 53 ára kynntust árið 1994 og giftust tveimur árum seinna.
Þegar þau kynntust átti Richards dótturina Farrah, 34 ára, úr fyrra hjónabandi.
Þau eignuðust síðan Alexiu, 27 ára, Sophiu, 23 ára, og Portia, 15 ára.
Skilnaðartíðindin hafa vakið mikla athygli og keppast nú netverjar um að koma með kenningar um ástæður hjónaslitanna. Hvorugt þeirra hefur tjáð sig nánar um málið.
