Beinagrind hennar fannst í janúar 2006 í stofunni fyrir framan sjónvarpið. Í kringum hana voru óopnaðar jólagjafir. Margir spurðu sig hvernig það gat gerst að enginn hafði saknað hennar eða tekið eftir því að hún var látin.
Joyce Carol Vincent var 38 ára þegar hún lést. Hún fæddist í Bandaríkjunum en flutti til London á háskólaárunum.
Þrátt fyrir erfiða æsku virtist Joyce ganga vel í lífinu en átti erfitt í einkalífinu og glímdi við andleg veikindi.
Þann 5. janúar 2006 bankaði manneskja á vegum ríkisins á dyr hennar til að innheimta ógreidda leigu. Enginn kom til dyra og var ákveðið að fara inn í íbúðina. Þar fannst beinagrind Joyce fyrir framan sjónvarpið en eina leiðin til að bera kennsl á hana var með því að nota tannlæknaskýrslur. Bresk yfirvöld sögðu allt benda til þess að hún hafi látist af náttúrulegum orsökum, hugsanlega vegna astmakasts.
Joyce starfaði hjá hinu virta bókhaldsfyrirtæki Ernst & Young en hætti skyndilega árið 2001. Fyrrverandi samstarfsmenn hennar höfðu mismunandi sögur að segja, sumir sögðu að hún hafði sagt upp á meðan aðrir sögðu að henni hafi verið sagt upp.
Kunningjar hennar lýstu henni sem hvatvísri, sem einhverri sem „hætti í vinnunni ef hún lenti upp á kant við annan starfsmann, sem flutti skyndilega.“
Við rannsókn kom í ljós að Joyce dvaldi um tíma á heimili fyrir þolendur heimilisofbeldis einhvern tíma milli 2001 og 2003.
Joyce var yngst af fimm systkinum og sú eina sem bjó í Bretlandi. Móðir hennar lést þegar hún var ung. Hún virtist hafa slitið sambandi við fjölskyldu sína áður en hún lést og er það talið vera vegna karlmanns sem hún átti í ástarsambandi við.
Hún átti ekki nána vini heldur treysti á félagsskap ókunnugra, nýrra kærasta og samstarfsfélaga.
Málið vakti mikinn óhug í Bretlandi á sínum tíma. Andlát hennar og hvernig því bar að vakti upp mikilvægar spurningar um einmanaleika, einangrun og þá sem þjást í þögninni.
Saga Joyce hefur verið viðfangsefni fjölda heimildarmynda, greina og meira að segja leikrits.
