Adda Margrét er 27 ára, mikið flúruð og götuð, mamma og systir sem hefur gengið í gegnum margt á sinni ævi.

Hún er nýjasti viðmælandi hlaðvarpsins Sterk saman.

Grínið varð að átröskun

Adda ólst upp á Kjalarnesi til að byrja með og var lögð í einelti í barnaskóla.

„Ég var mjög bráðþroska og varð kynþroska aðeins 9 ára gömul svo það var auðvelt að gera grín að því. Ég var þybbna barnið í systkinahópnum og oft pikkað í það í fjölskyldunni, í boðum og svoleiðis.‟

Adda þróaði ung með sér átröskun sem fylgt hefur hennar lífi í bylgjum til dagsins í dag.

Hún var 15 ára þegar hún flutti með fjölskyldunni til Danmerkur en áður hafði hún tekið ákvörðun um að nota ekki hugbreytandi efni sökum þess að bróðir hennar hafði farið í neyslu og festist þar.

Kynferðisofbeldi í Danmörku

Í Danmörku var allt annað viðmót til áfengis en á Íslandi.

Adda flutti að heiman 16 ára og bjó með systur sinni. Það ár varð hún fyrir kynferðisofbeldi af hendi þriggja fullorðinna manna.

„Ég sagði ekki frá því mamma hafði sagt að það mættu ekki koma menn í þessa íbúð en ég braut regluna þrátt fyrir að þetta hafi aldrei verið planið. Ég var svo hrædd um að verða skömmuð að ég sleppti því að segja frá.‟

Eftir tvö ár í Danmörku flutti Adda aftur til Íslands, til pabba síns, en það gekk ekki svo hún bjó á sófanum hjá bróður sínum, sem var í neyslu.

„Ég hélt fast í það að ég mætti í vinnu en auðvitað var þetta ekkert eðlilegt. Ég átti ekki fyrir kvöldmat og gekk í götóttum skóm í snjónum. Ég leitaði í áfengi og flúði í slæmt samband með þrítugum manni, 17 ára gömul. ‟

Hrottaleg nauðgun og martraðir

Adda skildi aldrei af hverju henni liði illa, hún áttaði sig ekki á öllum sínum áföllum fyrr en síðar. Hún ákvað ung fyrst hún gæti ekki verið sæta stelpan að vera fyndin og byggði upp þykkan vegg og grímu sem erfitt hefur verið að taka niður.

Í janúar 2021 lenti Adda í hrottalegri nauðgun, sem hún segir okkur frá.

Í kjölfar þessa áfalls upplifir hún heila viku af martröðum þar sem hin áföllin og kynferðisbrotin koma eitt af öðru til hennar.

„Ég fór í„ blackout‟ og allt í einu er ég með flösku í höndinni.‟

Adda ræðir hvað hún þurfti að gera til þess að komast frá þessum sársauka, fyrir sig og dóttur sína.

Systir hennar sagði við hana setningu sem kveikti á einhverju hjá henni og var nákvæmlega það sem hún þurfti á réttum tímapunkti.

Það má hlusta á viðtalið við Öddu Margréti í heild sinni í hlaðvarpinu Sterk saman.