Billboard, sem rekur auglýsingaskjái í strætóskýlum og víða á höfuðborgarsvæðinu, efndi í haust til opinnar samkeppni um myndlistarverk í almenningsrými í samstarfi við Y gallery og Listasafn Reykjavíkur. Dagana 1.–3. janúar 2023 verður Auglýsingahlé á yfir 450 stafrænum flötum Billboard um allt höfuðborgarsvæðið. Þessi tími verður helgaður sýningu á nýju verki eftir myndlistarmanninn Sigurð Ámundason sem valinn var úr hópi yfir 40 umsækjenda. Reikna má með að yfir 80% höfuðborgarbúa muni sjá verk Sigurðar dag hvern.

Listamaðurinn fær 1.000.000 kr greiddar fyrir verkið sem verður að sýningartíma loknum gefið í safneign Listasafns Reykjavíkur. Jafnframt er stefnt að því að verkið verði áfram sýnilegt í almenningsrými í borginni að loknu Auglýsingahléi Billboard.

Verkið er nú sýnt á yfir 450 skjáum um alla borgina, bæði skjáum í strætóskýlum og stórum skjáum (6x4m) við fjölfarnar götur. Sýningin hófst í gær (nyársdag), stendur yfir í dag og á morgun.

Valnefnd var skipuð skipuð fulltrúum frá Y galleríi, Listasafni Reykjavíkur, Billboard og SÍM , þeim Sigurði Atla Sigurðssyni, Björk Hrafnsdóttur, Jóni Felix Sigurðssyni og Elísabetu Stefánsdóttur.

Sigurður lýsir verkinu Rétthermi á þennan hátt: „Póst-strúktúralismi, óræðni og efi eru undirstöður verkanna. Merkingarlaus vörumerki sem túlka ekkert en líta stórt á sig, bera númer og íslenska stafi í handahófskenndri röð. Tákn sem tákna tákn, sem snúast um sjálf sig, leiðarvísar sem í raun leiða ekki neitt.“

Verkefnið er frábær vettvangur fyrir myndlist í  almenningsrými. Því er ætlað að lýsa upp skammdegið og gefa borgarbúum tækifæri á að njóta listar um alla borgina.