Þorvaldur Davíð Kristjánsson kemur endurnærður til baka eftir tveggja ára leiklistarpásu. Hann greindi frá þessu í útvarpsþættinum Ísland vaknar í morgun.
Þorvaldur Davíð var nýlega valinn í evrópska Shooting Stars hópinn fyrir árið 2023. Á hverju ári velja samtökin European Film Promotion (EFP) tíu unga og efnilega leikara og leikkonur.
Leikarinn sagði í viðtalinu að hann væri að koma endurnærður til baka eftir pásuna, sem var nauðsynleg.
„Ég er búin að leika síðan ég var 10 ára. Ég varð að breyta. Var orðinn þreyttur og vildi gera eitthvað annað. Ég gerði það og er endurnærður núna,“ sagði hann og bætti við að hann hafði fundið neistann á ný.
„Ég þurfti að finna það. Þegar maður er í svona sköpun, finnst mér, þá þarf maður að vera þar heils hugar. Allur. Ef þú ert það ekki þá hefur þú í raun ekki rétt á að gera það. Ég var búinn að missa þann neista sem þarf til að skapa. Þannig að ég ákvað að fara aðeins út úr þessu.“
Þorvaldur Davíð hefur getið sér gott orð sem leikari um árabil. Hann lærði við hinn virta Juilliard-listaháskóla í New York og útskrifaðist árið 2011. Ári seinna fór hann með aðalhlutverk í vinsælu kvikmyndinni Svartur á leik og var tilnefndur til Edduverðlauna. Árið 2020 hlaut hann verðlaunin fyrir besta leik í aukahlutverki fyrir sjónvarpsþáttaröðina Ráðherrann. Hann hefur einnig hlotið mikið lof sem sviðsleikari. Hann var tilnefndur til Grímuverðlauna árið 2014.
Leikarinn ástsæli fer með hlutverk Bjarna í kvikmyndinni Svar við bréfi Helgu sem kom út í byrjun september 2022 og hefur hlotið jákvæð viðbrögð gagnrýnenda og áhorfenda.
