Auglýsing frá Fasteignasölunni Trausta hefur valdið miklum usla innan Facebook-hópsins Markaðsnördar þar sem fólk með áhuga á auglýsingum og markaðsmálum deilir skoðunum sínum. Óhætt er að segja að áhugafólk um traust samfélagsmiðlarifrildi fái nokkuð fyrir sinn snúð.

Í umræddri auglýsingu er vakin athygli með áberandi hætti á „kjarnakonum“ sem starfa hjá fasteignasölunni. Undir myndunum af kvennkyns starfsmönnum fasteignasölunnar eru síðan smærri myndir af karlkyns starfsmönnunum þar sem viðskiptavinir eru hvattir til þess að heyra í þeim ef að það sé á tali hjá stelpunum.

Þegar auglýsingunni var deilt inn á hópinn þá kviknaði líflega umræða um ágæti hennar og sýndist sitt hverjum.

Einn notandi benti á athyglin sem auglýsingin fengi eins og sér benti til þess að hún væri góð. „Sem yfirlýstum öfgafemínista finnst mér hún ekkert frábær,“ sagði notandinn. Benti viðkomandi á að meirihluti fasteignaauglýsinga væru svipaðar nema með öfugum kynjahlutföllum og því væri merkilegt að „pönk“ sem birtist í umræddri auglýsingu myndi setja kommentakerfið á hliðina.

Annar notandi er á sama máli. „Skemmtileg auglýsing sem vekur athygli. Vel heppnuð staðfærsla með húmor að leiðarljósi. Skil ekki að fólk átti sig ekki á að viðbrögð við auglýsingunni með öfugum formerkjum væru að sjálfsögðu önnur enda væri ekkert fyndið við það þar sem það væri áframhald á þeim karlavaldakúltúr sem hefur verið til staðar í hundruði ára. Þarna er verið að gera góðlátlegt grín með því að snúa hlutverkum við,“ segir viðkomandi og er hæstánægð með auglýsinguna.

Það eru margir sem eru þó ekki á því að auglýsingin sé vel heppnuð.

„Kjánalegt. Misheppnuð tilraun til að vera fyndin og sniðug,“ sagði einn og önnur bætti við: „Skelfileg auglýsing langt útfyrir öll mörk á hitt kynið(karla)“ og lét fylgja með hinn gildishlaðna kúkabroskarl. Þá orgaði einn að um PC-rúnk væri að ræða.

Þrátt fyrir að bæði konur og karlar hafi látið í ljós óánægju sína voru karlar þó í meirihluta. Kjarnaði því einn umræðuna með því að láta þessi orð falla „Mikið af hræddum karlmönnum í þessum þræði“.