Tónlistarkonan geysivinsæla Cardi B vakti mikla athygli á samfélagsmiðlinum Instagram þegar hún birti myndband af nýjasta húðflúrinu sínu. Cardi B, sem gaf út slagarann WAP í fyrra, klæddi sig úr öllu nema brókinni til að sýna húðflúrið almennilega.
Hún deildi umræddu myndbandi í svokallað „story“ á Instagram en því sem er deilt þangað er eytt sjálfkrafa eftir 24 klukkutíma. Um er að ræða stórt húðflúr sem teygir sig frá vinstri öxlinni og alveg niður eftir bakinu. Húðflúrið rennur svo inn í annað húðflúr sem hún er með á hægra lærinu. Í húðflúrinu má meðal annars sjá fjólublá, blá, rauð, gul og græn blóm ásamt fiðrildi.
Cardi hefur áður sýnt húðflúrið en þó ekki í heild sinni. Hún segir að það hafi tekið nokkra mánuði að klára það en allt í allt tók húðflúrið 60 klukkutíma. Það var gert í hlutum í 10 mismunandi borgum.
Myndbandið sem Cardi deildi hefur vakið mikla athygli hjá dægurmálamiðlum á meginlandinu en þeir hafa margir greint frá þessu 8 sekúndna langa myndbandi. Skjáskot úr myndbandinu má sjá hér fyrir neðan.
