Tónlistarmaðurinn Geir Ólafsson betur þekktur sem hreinlega Geir Ólafs, var í viðtali í þættinum Segðu mér sem er á Rás 1, en þar ræddi hann til að mynda um ferill sinn, áfengisvanda og ástina. Í viðtalinu segir Geir frá því hvernig hann kynntist eiginkonu sinni, Adriönu Patricia Sanchez Krieger.

Árið 2009 starfaði Geir hjá fjölskyldufyrirtækinu í Dúni og Sæng. Þá var Adríana stödd á Íslandi og átti pening sem hún vildi eyða á landinu og keypti sæng frá fyrirtækinu. Um var að ræða æðadúnsæng, sem ekki var til á lager, þannig að Geir bjó hana til sjálfur og fór á Hótel Bláa lónsins til að afhenda sængina til hennar.

„Ég bjó til þessa sæng. Saumaði fyrir hana og kom með hana á hótelið í Bláa lóninu. Þegar ég mæti þá er hópur kvenna sem voru að gæsa vinkonu sína. Þær vildu endilega fá mynd með mer og hlupu til mín og ég segi sjálfsagt. Ég í myndatöku og er alltaf með sængina“ segir hann og hlær.

Svo segist hann hafa séð Adríönu og hún hafi spurt hversvegna þær væru að taka myndir með honum og hann hafi svarað: „Ég er frægasti söngvari þessa lands,“. Adríana hafi viljað fá sönnun á því. „Þá tók ég bara O sole mio, og þá byrjaði okkar vinátta“

Nokkurum árum seinna hafi þau byrjað að spjalla í gegnum Skype. Hann hafi svo boðið henni til Hollywood og síðan hafu þau verið saman og eiga nú barn saman.

„Hún sló til og síðan höfum við verið saman. Svo eignuðumst við dóttur okkar 2016 og við giftumst ári síðar. Ég er svo ótrúlega heppinn.“