Á vefversluninni Amazon.com er nú hægt að versla undirskrift íslensku leikkonunnar Maríu Ellingsen. Undirskriftin kostar 67,44 bandaríkjadali sem samsvarar rúmum 9.200 krónum á gengi dagsins í dag. Heimsending á undirskriftinni kostar tæpar 5.500 krónur. Gerir þetta samtals um 14.700 krónur. Hægt er að fá undirskriftina senda til Íslands en sendingartíminn gæti verið óvenju langur sökum kórónuveirunnar.
Leikkonan María Ellingsen hefur leikið í fjölda verka hérlendis og erlendis. Í Hollywood er hún þekktust fyrir hlutverk sitt í The Mighty Ducks 2 sem kom út árið 1994. Teymið í kringum myndina hittist árið 2014 og gerði sér glaðan dag til að fagna því að 20 ár voru liðin frá því að myndin kom út. Framleiðandi myndarinnar, Jordan Kerner, bauð heim til sín.
Á síðasta ári kom María fram á nýja sviði Borgarleikhússins í verkinu „Er ég mamma mín?“ eftir Maríu Reyndal.
Undirskrift Maríu er ekki sú eina sem er til sölu á Amazon. Þar er einnig hægt að festa kaup á undirskriftum frá söngvaranum Bon Scott og Ace Freley gítarleikara KISS.
