Fegurðardrottningin og áhrifavaldurinn Arna Ýr Jónsdóttir virðist heldur betur vera í bobba. Innan Facebook-hópsins Markaðsnördar greinir hún frá því að Instagram-reikningur hennar hafi verið hakkaður. Í kjölfar þess hafi henni borist ógandi tölvupóstur frá manni sem kallar sig Tagir Mikheev. Þegar þetta er skrifað Instagram-aðgangur Örnu Ýr ekki aðgengilegur.
Arna Ýr er með ríflega 50 þúsund fylgjendur og því vill hún eðlilega endurheimta aðgang sinn. „Ég er mögulega á vitlausum stað en sakar ekki að prufa! IG mitt er hakkað og emailinu bakvið það var breytt. Viðkomandi er að blackmaila mig og ég veit ekkert hvað ég á að gera,“ segir hún og bætir við:
„Ekkert help center virkar, ekkert support – ekkert. Ég er (eða var) með ca 55 þúsund fylgjendur þessvegna ætla þeir örugglega að selja accountinn og græða? Einhver lent í svipuðu eða getur gefið mér ráð?,“ spyr Arna Ýr.
Skilboð fjárkúgarans eru á ensku en mætti þýða svo: „Við sjáum að þú ert að lesa skilaboðin okkar en ekki að svara okkur. Við vildum ekki eyða myndunum. Þú svaraðir ekki svo þú þarft ekki aðgang. Því miður þá erum við byrjuð að hreinsa aðganginn (eyddum myndunum) og við munum selja aðgangin. Mér þykir það leitt, vertu sæl.“
Henni er bent á að Auðunn Blöndal, Auddi Blö, hafi lent í svipuðum aðstæðum. Hún segist hafa óskað eftir hjálp hans nú þegar. „Ég frétti það og sendi skilaboð á hann áðan – vonandi nennir hann að svara mér.“
