„Það er verið að hlutgera mig í þræði hjá Ian McKellen á twitter… og ég er að FÍLA ÞAÐ!!!“
Þetta skrifar Jóhannes Haukur Jóhannesson á Facebook-síðu sína þar sem hann slær á létta strengi. Leikarinn vísar í Twitter-færslu frá stórleikaranum Ian McKellen, en þeir léku nýverið saman í dramatryllinum The Good Liar ásamt Helen Mirren.
McKellen deilir á síðu sinni hlekk sem segir frá nýjasta hlutverki Jóhannesar, en til stendur hjá honum að leika á móti Mark Wahlberg í vísindaskáldsögunni Infinite í leikstjórn Antoines Fuqua (Training Day, The Equalizer).
Sjá einnig: Jóhannes mætir Mark Wahlberg í nýjum spennutrylli
Við færslu McKellens eru annars vegar nokkrir sem sitja ekki á skoðunum sínum í garð Jóhannesar og er allt útlit fyrir að margir hverjir halda ekki vatni yfir leikaranum. McKellen tekur fram í sinni færslu að Jóhannes leiki persónu að nafni Vlad. Við þessu svarar einn netverji hressilega: „Hann má Vlada mig eins og hann vill. Hvílík augu.“
Þá segir annar: „Þessi Infinite hljómar áhugaverð. Og þessi maður… namm!“
Jóhannes er afar hreykinn af þessum viðbrögðum og má þess geta að meira að segja Felix Bergsson stóðst ekki mátið að skilja eftir sín viðbrögð við umræddum þræði.
@IanMcKellen – He can Vlad me as much as he wants. Amazing eyes.
— first5things (@1st5things) September 11, 2019
Omg!!
— Felix Bergsson (@FelixBergsson) September 11, 2019