Söngvarinn Páll Óskar Hjálmtýsson átti ekki von á að finna löngu týndan dýrgrip þegar hann brá sér í hádegismat á Hamborgarabúlluna.
Á einum veggnum þar hanga jakkaföt sem saumuð voru á hann árið 1995. „Ég fann efnið í New York og Filippía Elísdóttir saumaði á mig jakkafötin, sem ég notaði aðallega á böllum með Milljónamæringunum,“ segir Palli. Árið 1997 gaf hann Hard Rock fötin, en þau gufuðu upp þegar Hard Rock skellti í lás í Kringlunni 31. maí 2005. „Ég er búinn að leita að þessu í mörg ár og hef ekki vitað um afdrif þeirra fyrr en núna.“
