Guðný María Arnþórsdóttir heldur áfram að slá í gegn og nýverið sendi hún frá sér lagið Tjilla með þér. Hún skaust upp á íslenskan stjörnuhimin með Páskalaginu. Guðný var 59 ára þegar hún ákvað að láta draum sinn rætast og semja lög og gefa þau út.

Um tilurð Tjilla með þér segir Guðný María: „Mig langaði að gera jákvæð lög um kynin. Karlmenn hafa oft hjálpað mér og verið mér góðir vinir og eftir að lagið birtist mér, þá hugsaði ég um texta. Og þessi saga varð til. Í raun sönn saga en elsti bróðir minn sendi mig eitt sinn í námshring í kommúnistafræðum. Ég var þá nýkomin heim til Akureyrar frá London í hátískuklæðnaði frá Oxford Street. Ég líktist því ekkert mussufólkinu sem ég hitti á Akureyri í þessum námshring, enda ekki með mikinn áhuga á pólitík.“

Þar kynntist Guðný spennandi manni og ræddu þau fræðin og hittust síðan reglulega á Kaffistofu KEA.

„Ég taldi mér trú um að við værum pólitískir félagar, en í raun var ég rosalega skotin. Ég verð annars sjaldan skotin og átta mig oft ekki á því strax. Ég hef einnig reynt að stjórna þessu, kynnst mönnum sem væri hagstætt að elska. Þá hef ég sest niður og horft djúpt í augu þeirra, ákveðin í að verða skotin. En ekkert gerist! Svo getur næsti gaur stolið hjarta mín á einu augnabliki, það er ekki hægt að stjórna því.“

Guðný sendi nýlega frá sér myndband við nýjasta smellinn. Mótleikari hennar þar var vinur hennar úr næstu götu.

„Ég er ekki skotin í neinum núna, svo ég viti,“ segir Guðný glettin og bætir við að næst sé á dagskrá að semja lag sem mun heita AKUREYRAR-BEIB. Hugmyndin kviknaði þegar Guðný var að troða þar upp í unglingasamkvæmi á Akureyri. „Þá fór að snjóa, bærinn varð fullur af snjó, þessi fallegi bær,“ bætir Guðný við en nýja lagið er rapplag sem mun án efa vekja athygli og gleði líkt og hin lög þessarar vinsælu söngkonu.