Stöðufærsla sem Rebekka Guðleifsdóttir skrifaði í fyrradag hefur vakið óvenjumikla athygli en þegar þetta er skrifað hefur honum verið deilt nærri níu hundruð sinnum og lækaður ríflega þúsund sinnum. Þar hraunar hún yfir ráðamenn Íslands og segir þá eiga að skammast sín fyrir það hvernig mál ljósmæðra hafa þróast.

„Bjarni Benediktsson , þú átt fjögur börn. Svandís Svavarsdóttir, þú átt fjögur börn. Katrín Jakobsdóttir , þú átt þrjú börn. Þegar þessi 11 börn ykkar komu í heiminn, tókuð þið sjálf á móti þeim? Eða nutuð þið þeirra forréttinda (sem fólk víðsvegar í heiminum býr ekki við) , að þaulreyndar, velmenntaðar ljósmæður, yfirvegaðar og hlýlegar í fasi, stóðu vaktina og hjálpuðu börnunum ykkar í heiminn?,“ spyr Rebekka og merkir sérstaklega fyrrnefnda ráðherra.

Rebekka segir að þetta fólk eigi að sjá sóma sinn í því að leiðrétta laun ljósmæðra. „Fannst ykkur þeirra þátttaka í þessum merkisviðburðum í lífi ykkar svo ómerkileg, óþörf jafnvel, að ykkur finnst í alvöru frekt af þeim að vilja fá laun fyrir sem endurspegla mikilvægi þeirra og sérkunnáttu? Svona i alvöru talað, hver djöfullinn er eiginlega að ykkur, að geta ekki séð sóma ykkar í því að sýna þessum konum þá sjálf sögðu virðingu sem þær eiga skilið? Skammist ykkar,“ segir Rebekka.