Spilling og umræða um spillingu er þjóðaríþrótt Íslendinga. Sagt er að landsmenn séu almennt mjög andsnúnir spillingu, nema þegar þeir bera eitthvað sjálfir úr býtum vegna hennar.
Vilhjálmur Bjarnason, lektor og fv. alþingismaður, er einn þeirra sem hvað harðast hafa barist gegn spillingu í íslensku samfélagi. Eftir heldur misheppnaðan stjórnmálaferil, sem endaði með því að hann tapaði í prófkjörum með afgerandi hætti, bæði í Garðabæ og Reykjavík, hefur Vilhjálmur nú verið ráðinn í sérverkefni í Seðlabankann – án auglýsingar.
Svo mikinn spillingarfnyk leggur af ráðningunni að upplýst hefur verið að Vilhjálmur hafi verið ráðinn til bankans áður en ákveðið var hvað hann ætti að gera.
Vilhjálmur, sem stundum hefur verið kenndur við túlípana, hefur því orðið eigin spillingu að bráð og er þá væntanlega ekki lengur andsnúinn henni.
Eða eins og sagði í frægri hendingu: „Þetta sem helst nú varast vann varð samt að koma yfir hann.“