Margir eru undrandi á þeirri ákvörðun meirihlutans á Akureyri, sem samanstendur af Samfylkingu, Framsóknarflokki og L-lista, að ganga til viðræðna við Ásthildi Sturludóttur sem bæjarstjóra, en hún var áður bæjarstjóri í Vesturbyggð. Sér í lagi í ljósi þess að hún er Sjálfstæðiskona og dóttir Sturlu Böðvarssonar, fyrrverandi samgönguráðherra.

En þetta kann að vera klókt bragð. Sjálfstæðismenn bjuggust við góðum sigri í sveitarstjórnarkosningunum í vor, jafnvel hreinum meirihluta, en raunin varð þriggja prósenta tap og óbreyttur fulltrúafjöldi. Gremja þeirra er því mikil og búist við harðari andstöðu á komandi kjörtímabili en verið hefur.

Sjálfstæðismenn eru langöflugasti minnihlutaflokkurinn í bænum en erfitt verður fyrir þá að beita sér af of mikilli hörku gegn bæjarstjóra og vonarstjörnu úr eigin flokki.