Ríkisstjórnin hefur boðað til þjóðatkvæðagreiðslu um áframhald aðildarviðræðna við Evrópusambandið. Verður þjóðaratkvæðagreiðslan haldin þann 29. ágúst næstkomandi.
Á vef Stjórnarráðs Íslands er að finna spurningar og svör um málið. Fyrsta spurningin er um hvað verið sé að kjósa og svarið er eftirfarandi:
„Þjóðaratkvæðagreiðslan snýst um það hvort íslensk stjórnvöld eigi að halda áfram aðildarviðræðum Íslands við Evrópusambandið. Ef kjósendur svara þeirri spurningu játandi fara aðildarviðræður í kjölfarið af stað og þegar og ef samningar nást mun sá samningur ganga til annarrar þjóðaratkvæðagreiðslu um hvort Ísland eigi að ganga í Evrópusambandið.“
Spurningin á atkvæðaseðlinum verður eftirfarandi: „Á að halda áfram viðræðum um aðild Íslands að Evrópusambandinu?”
Svarmöguleikarnir verða tveir:
Ákvörðun ríkisstjórnarinnar um að halda þjóðaratkvæðagreiðslu um framhald aðildarviðræðna við ESB byggir á stefnuyfirlýsingu stjórnarflokkanna, þar sem segir: „Þjóðaratkvæðagreiðsla um framhald viðræðna um aðild Íslands að Evrópusambandinu fer fram eigi síðar en árið 2027.“
Í þessari þjóðaratkvæðagreiðslu er ekki verið að að greiða atkvæði um hvort Ísland eigi að ganga í ESB. Aðild yrði borin undir þjóðina í sérstakri þjóðaatkvæðagreiðslu að afloknum aðildarviðræðum. Á vef Stjórnarráðsins segir:
„Það er mat ríkisstjórnarinnar að áframhald aðildarviðræðna við ESB sé svo viðamikið hagsmunamál að ekki komi annað til greina en að leita leiðsagnar þjóðarinnar í þeim efnum. Þjóðin hafði ekki beina aðkomu að því að hefja ferlið árið 2009 og nú er tækifæri til að leiðrétta það. Þá liggur fyrir að þjóðin getur ekki tekið afstöðu til aðildar nema að aðildarviðræðum verði haldið áfram og þeim lokið með samningi um aðild Íslands að ESB sem síðan yrði lagður fyrir þjóðina í annarri atkvæðagreiðslu til samþykktar eða synjunar.“
Ef samþykkt verður í þjóðaratkvæðagreiðslunni 29. ágúst að halda áfram aðildarviðræðum við ESB mun þeirri ósk þjóðarinnar verða komið á framfæri við sambandið. „Framhald viðræðna yrði síðan staðfest á formlegri ríkjaráðstefnu milli Íslands og aðildarríkjanna.“
Aðildarumsókn Íslands að ESB frá 2009 er enn í gildi og því er hægt að taka upp þráðinn í viðræðunum ef niðurstaðan verður á þá leið í þjóðaratkvæðagreiðslunni. „Í kjölfarið færu formlegar aðildarviðræður fram þar sem unnið yrði út frá samningsmarkmiðum sem Ísland hefði sett sér.“
Ef niðurstaðan verður hins vegar „nei“ í þjóðaratkvæðagreiðslunni verður ekki farið aftur af stað með viðræður við ESB.
Frekari upplýsingar um málið eru hér.
