Þingflokkur Sjálfstæðisflokksins staðfesti á fundi sínum sem hófst nú fyrir hádegi að Ólafur Adolfsson þingmaður flokksins taki við af Hildi Sverrisdóttur sem þingflokksformaður.

Vísir greinir frá þessu en Guðrún Hafsteinsdóttir formaður flokksins hefur sjálf ekki tilkynnt um niðurstöðuna á samfélagmiðlum.

Hildur sagði í vikunni af sér sem þingflokksformaður en verður áfram í þingliði flokksins. Ljóst er að Guðrún vildi skipta Hildi út en hafði ekki haft nægilegan styrk í þingflokknum til að hrinda því í framkvæmd.

Hildur studdi Áslaugu Örnu Sigurbjörndóttur í formannskjöri flokksins þar sem sú síðarnefnda beið nauman ósigur gegn Guðrúnu.

Hildur sagði á endanum af sér að eigin sögn til að forða átökum í flokknum en það virtist blasa við að Guðrún ætlaði að freista þess að knýja fram atkvæðagreiðslu í þingflokknum um áframhaldandi setu Hildar í stóli þingflokksformanns.

Ólafur er hins vegar í þeim armi flokksins sem studdi Guðrúnu í formannskjörinu og ljóst virðist því að formaðurinn hefur með þessum breytingum náð að auka styrk sinn í þingflokknum.