Áslaug Arna Sigurbjörnsdóttir, formannsframbjóðandi í Sjálfstæðisflokknum, hefur ekki áhyggjur af því að fjölskyldutengsl hennar inn í útgerðina í landinu skapi ímyndarvandamál fyrir hana nái hún kjöri. Hún vonast til að fólk dæmi hana af verkum hennar og ástríðu fyrir sjálfstæðisstefnunni. Hún segir flokkinn hafa sofið á verðinum gagnvart litlum og meðalstórum fyrirtækjum og talsambandið við þau hafi rofnað. Áslaug Arna er gestur Ólafs Arnarsonar í hlaðvarpi Eyjunnar.
Eyjan - Aslaug Arna - 4
Sjálfstæðisflokkurinn hefur verið gagnrýndur fyrir að vera í mikilli varðstöðu fyrir útgerðina í landinu. Ég verð að spyrja þig að þessu vegna þess að þú ert tengd útgerðinni í landinu. Þó að þú sért ekki sjálf í útgerð hefurðu mikil tengsl við útgerðina í gegnum fjölskyldutengsl. Hefurðu engar áhyggjur af því að það geti reynst ímyndarvandamál verðir þú kosin formaður?
„Nei, ég vona að fólk dæmi mig af verkum mínum og minni sýn á pólitíkina, sama við hvað faðir minn hefur starfað eða einhver fjölskyldutengsl. Ég held að verk mín og ástríða fyrir Sjálfstæðisstefnunni eigi að dæma sig sjálf og fólk getur skoðað hvaðan ég kem og hvernig ég hef talað. Við eigum að tala upp fyrirtæki í landinu, við eigum að tala upp atvinnuvegi, við eigum að tala upp verðmætasköpun, samkeppni og tækifæri. Í því finnst mér við mest hafa sofið á verðinum gagnvart litlum og meðalstórum fyrirtækjum og þar hafi talsambandið okkar helst rofnað. Ég tek undir þá gagnrýni og set það mjög mikið á dagskrá að þar eigum við að gera miklu betur, þetta á að vera fólk sem fylgir okkur að málum.“
Áslaug Arna segir Sjálfstæðisflokkinn hafa leyft öðrum að skilgreina flokkinn með ákveðnum hætti: „Skilgreina fyrir hverja við stöndum, fyrir hverja við tölum og hver flokkurinn er. Við þurfum að svara því með kröftugri hætti af því að sjálfstæðisstefnan vinnur fyrir alla. Hún lyftir öllum upp í öllum stéttum, hvar sem fólk er, og það er það sem er svo heillandi við stefnuna sjálfa.“
Það hefur einmitt verið haft á orði að Sjálfstæðisflokkurinn tali máli þeirra sem geta vel talað máli sínu sjálfir og vanræki þá sem þurfa málsvara.
„Já, ég get alveg tekið undir það að við eigum að vera skýrari málsvari fyrir þá sem leggja mikið undir í litlum fyrirtækjum, að það borgi sig að vera duglegur. Líka fyrir þá sem minna mega sín. Við viljum forgangsraða velferðinni og jöfn tækifæri og verðmætasköpun eru forsenda þess að geta byggt upp öfluga velferð og hjálpað þeim sem þurfa á hjálp að halda. En við viljum ekki halda fólki þar, við viljum gera vel við þá sem þurfa á því að halda en hjálpa fólki líka til að hjálpa sér sjálft og það er það sem er svo fallegt við stefnuna og þar þurfum við kannski að ná í ákveðna mýkt gagnvart því að stefnan okkar talar einmitt fyrir þeim, en fara ekki í vörn fyrir stefnuna eða vera hrædd við að tala fyrir henni.“
Einnig er hægt að hlusta á Spotify.
