Kristrún Frostadóttir forsætisráðherra hélt fyrr í kvöld fyrstu stefnuræðu á Alþingi í kvöld. Ræðan átti upphaflega að fara fram miðvikudaginn 5. febrúar en var frestað vegna veðurs. 

Ríkisstjórnin kynnti þingmálaskrá sína fyrir viku, mánudaginn 3. febrúar og breytti því þeirri venju að ríkisstjórn birti þingmálaskrá að lokinni stefnuræðu forsætisráðherra. Alls eru 114 mál á nýju þingmálaskránni.

Sjá einnig: Svona ætlar ríkisstjórnin að ná stjórn á Airbnb og annarri skammtímaleigu til ferðamanna

Umræðum kvöldsins er skipt í tvær umferðir. Fyrst flytur forsætisráðherra stefnuræðu sína og hefur tólf mínútur til framsögu. Aðrir þingflokkar fá sex mínútur hver í fyrri umferð. Í seinni umferð fá þingflokkarnir sex mínútur hver.

Horfa má á stefnuræðuna hér.

Forsætisráðherra sagði í stefnuræðu sinni nýja ríkisstjórn ganga samstíga til verka og vinna samkvæmt nýju verklagi. Kristrún segir fulla einingu ríkja í ríkisstjórninni um öll þau mál sem birt eru í þingmálaskrá og skrána vera trúverðuga. Ekki sé verið að sóa tíma í mál sem ekki munu komast til framkvæmda.

Aðgerðum ríkisstjórnarinnar er ætlað að ná stöðugleika í efnahagslífinu og lækka vexti. Stöðugleikaregla verður tekin upp, en samkvæmt henni verður ekki farið í ný útgjöld án hagræðingar eða aukinna tekna. Samkvæmt þingmálaskrá er stefnan meðal annars sett á lækkun vaxta, bráðaaðgerðir í húsnæðismálum, afmarkaðar aðgerðir í velferðarmálum, breytingar í sjávarútvegi og aðgerðir í þágu neytenda.