Tveir nýir framkvæmdastjórar hafa tekið til starfa hjá Póstinum, eins og segir í tilkynningu.

Benedikt Þorgilsson hefur verið ráðinn framkvæmdastjóri upplýsingatækni og hefur þegar hafið störf. Hann hefur starfað hjá Póstinum frá árinu 2018; fyrst sem hugbúnaðarsérfræðingur og síðar, frá árinu 2022, sem teymisstjóri hugbúnaðarþróunar. Benedikt er með MBA-gráðu frá Háskólanum í Reykjavík og BSc í tölvunarfræði og hefur víðtæka þekkingu og reynslu af störfum innan hugbúnaðargeirans. 

„Það eru spennandi tímar fram undan hjá Póstinum þar sem tæknin mun gegna lykilhlutverki í því að bæta þjónustu, einfalda ferla og styðja við vöxt og nýsköpun innan fyrirtækisins. Ég hlakka til að taka þátt í þeirri vegferð með öflugu teymi og leggja mitt af mörkum til að gera Póstinn enn öflugri í stafrænum heimi,“ segir Benedikt.

Eymar Pledel Jónsson hefur verið ráðinn framkvæmdastjóri viðskiptavina hjá Póstinum og hefur þegar hafið störf. Hann er með víðtæka reynslu af sölu- og markaðsstörfum og var til að mynda svæðisstjóri WOW Air á sölu- og markaðssviði í S-Evrópu. Utan vinnu starfrækir Eymar Vínskólann ehf. þar sem hann leiðir nemendur sína um hinn heillandi heim léttvína. Eymar þekkir starfsemi Póstsins vel. Hann hóf störf hjá Póstinum árið 2020 og sinnti starfi vörustjóra til ársins 2023 en þá tók hann við sem forstöðumaður vörustýringar. Í því starfi kom hann að innleiðingu ýmissa umbótaverkefna sem hefur verið hluti af því umbreytingarferli sem Pósturinn hefur verið í um nokkurt skeið. 

„Ég er gríðarlega spenntur að taka við nýju hlutverki hjá Póstinum og hlakka til að fá að takast á við þau fjölmörgu tækifæri sem það býður upp á,” segir Eymar. „Pósturinn stendur á tímamótum og það er heiður að fá að leiða sölu- og markaðsstarf fyrirtækisins á þannig tímum.“

„Það er afar ánægjulegt að fá Benedikt og Eymar inn í framkvæmdastjórn Póstsins,“ segir Þórhildur Ólöf Helgadóttir, forstjóri. „Báðir hafa sýnt mikinn metnað og árangur í sínum störfum hjá fyrirtækinu og þeir þekkja starfsemina vel. Reynsla þeirra og þekking mun styrkja okkur enn frekar í því umbreytingar- og vaxtarferli sem við erum í. Með Benedikt í fararbroddi upplýsingatækninnar og Eymar í forystu viðskiptavinasviðsins erum við í enn sterkari stöðu til að efla þjónustu okkar, auka nýsköpun og tryggja að við mætum þörfum viðskiptavina með öflugum hætti.“