Aðalfundur Evrópuhreyfingarinnar verður haldinn í Iðnó á morgun, fimmtudaginn, 22. maí, og hefst hann kl. 17. Á fundinum verður kosinn nýr formaður hreyfingarinnar, en Jón Steindór Valdimarsson, gefur ekki kost á sér til áframhaldandi setu.
Magnús Árni Skjöld Magnússon, dósent við Háskólann á Bifröst, hefur einn lýst yfir framboði til formanns.
Einnig verður kosin ný stjórn á fundinum og eru 11 manns í framboði til stjórnar. Þeir eru eftirfarandi:
Helga Vala og Páll Rafnar eiga sæti í fráfarandi stjórn og því er ljóst að mikil endurnýjun verður í stjórninni.
Athygli vekur að Ágúst Ólafur Ágústsson, fyrrverandi varaformaður Samfylkingarinnar, gefur nú kost á sér til stjórnarstarfa hjá Evrópuhreyfingunni. Ágúst var annar tveggja formanna Evrópunefndar ríkisstjórnar. Í þeirri nefnd sátu fulltrúar allra stjórnmálaflokka ásamt fulltrúum verkalýðshreyfingar og atvinnurekenda. Meginverkefni hennar var m.a. að fylgjast með þróun mála í Evrópu og leggja mat á breytingar út frá hagsmunum Íslendinga.
„Við fórum til Brussel og funduðum m.a. með framkvæmdastjórum ESB og gerðum í kjölfarið á því sérstaka úttekt á hugsanlegri einhliða eða tvíhliða upptöku evru“, segir Ágúst í samtali við Eyjuna.
„Ég er annars ansi stoltur af því að sem annar formaður þessarar nefndar þá tókst okkur flestum í nefndinni að vinna sameiginlegt sérálit en að því stóðu ASÍ, Viðskiptaráð, Samfylkingin, Samtök ferðaþjónustu, Samtök iðnaðarins og Samtök verslunar og þjónustu um „að hagsmunum íslensku þjóðarinnar verði best borgið innan ESB og með upptöku evru“ og að ríkisstjórnin ætti „að hafa það eitt af sínum forgangsverkefnum að skilgreina samningsmarkmið og sækja um aðild að ESB.“ Það þótti talsvert afrek á sínum tíma“, segir Ágúst.
Ágúst býr yfir reynslu á alþjóðavettvangi og starfaði á aðalskrifstofu Sameinuðu þjóðanna í New York þar sem hann m.a. greindi árangursríkar aðgerðir Sameinuðu þjóðanna á vettvangi fjármála, stjórnunar og stefnumótunar.
„Ég kom að hönnun og greiningar á fyrstu könnun Sameinuðu þjóðanna meðal aðildarríkja um frammistöðu stofnana en það var heilmikið mál að vera í sambandi við ansi ólík ríki s.s. Norður-Kóreu sem sagðist ekki vera með internettengingu til að geta sinnt þessu eða Líbíu sem sagðist ekki geta svarað könnuninni þar sem á þeim tíma væri borgarastyrjöld í gangi eða Túrkmenistan sem sagðist einfaldlega ekki vilja vera í sambandi við umheiminn.“
Ágúst var meðhöfundur að úttekt um sjávarútvegsstefnu Evrópusambandinu í bók sem Samfylkingin gaf út. Hann starfar nú einnig við ráðgjöf m.a. á sviði verkalýðsmála, heilbrigðismála og menningarmála og undanfarin ár hefur hann stundað kennslu við Háskóla Íslands.
Þá er Ágúst í stjórn Dýraverndarsambands Íslands.
„Ég er sannfærður að reynsla mín og þekking geti verið málstað Evrópuhreyfingarinnar til góðs,“ segir Ágúst Ólafur.
