fbpx
Mánudagur 11.ágúst 2025
EyjanFastir pennar

Óttar Guðmundsson skrifar: Reykjavíkurflugvöllur

Eyjan
Laugardaginn 1. mars 2025 06:00

Reykjavíkurflugvöllur. Mynd/Sigtryggur Ari

Ekki missa af Helstu tíðindum dagsins í pósthólfið þitt

Lesa nánar

Ég var á fundi á dögunum um framtíð Reykjavíkurflugvallar. Ingólfur Arnarson og kona hans Hallveig Fróðadóttir voru fulltrúar Reykjavíkur en aðrir á fundinum voru nokkrir valinkunnir höfðingjar utan af landi eins og Egill afi minn Skallagrímsson, Grettir sterki, Jón Arason biskup og Hallgerður langbrók og Bergþóra frá Bergþórshvoli. Allir þessir fulltrúar landsbyggðarinnar voru sammála um það að flugvöllur skyldi standa í Vatnsmýrinni um aldur og ævi. Leiðin til Reykjavíkur væri löng og erfið og hagkvæmast væri að taka flugið og lenda í túnfætinum hjá Ingólfi og Hallveigu. Stjórnsýslan, sjúkrahúsin og skemmtilegustu verslanirnar væru í Reykjavík svo að samgöngur við höfuðstaðinn yrðu að vera greiðar. Í raun ætti að vera þyrluþjónusta frá flugvellinum í helstu stjórnarskrifstofur, spítalann og Kringluna fyrir íbúa dreifbýlisins. Fólk gæti stigið út úr áætlunarflugvélinni og beint upp í þyrlu til fara á áfangastað. Þannig kæmist fólk fram hjá endalausum umferðatöfum á götur bæjarins.

Þetta utanbæjarfólk var sammála um skaðsemi Reykjavíkur fyrir allt daglegt líf í landinu. „Borgin er siðspillandi,“ sagði Grettir sterki dapurlega, „en ég þarf að heimsækja borgina reglulega til að kaupa mér eiturlyf og fá mér tattú.“ Jón Arason sagðist fljúga frá Sauðárkróki til Reykjavíkur til að hitta nýja biskupinn og fara á fundi í kvæðamannafélaginu Iðunni. Hallgerður og Bergþóra fóru vikulega til Reykjavíkur til að stjórna hlaðvarpsþætti um valdeflingu kvenna. Egill afi vildi helst fljúga frá Borgarnesi til að hitta þvagfæralækni og fara á AA fundi. Þeir sögðu að helvítis Reykjavíkurpakkið hefði enga lögsögu yfir flugvellinum.

Fundurinn endaði með því að Egill og Grettir lömdu Ingólf og Hallveigu til óbóta og sögðu að flugvöllurinn yrði aldrei færður úr stað. Að því búnu fóru þeir saman í leigubíl í vafasamt partý í Valshverfinu við Hlíðarenda til að fá sér ofskynjunarefni og spila félagsvist. Ingólfur og Hallveig fóru aftast í löngu röðina á Bráðamóttökunni í Fossvogi og skömmuðust sín fyrir að vera til.

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.

Fleiri fréttir

Pennar

Mest lesið

Nýlegt

EyjanFastir pennar
Fyrir 2 vikum

Svarthöfði skrifar: Fólk er ekki fífl – það skilur sérhagsmunina þegar það sér þá

Svarthöfði skrifar: Fólk er ekki fífl – það skilur sérhagsmunina þegar það sér þá
EyjanFastir pennar
Fyrir 2 vikum

Nína Richter skrifar: Ozzy er dáinn – en trendar hann?

Nína Richter skrifar: Ozzy er dáinn – en trendar hann?
EyjanFastir pennar
Fyrir 3 vikum

Svarthöfði skrifar: Veit Guðrún Hafsteinsdóttir hvort hún er að koma eða fara?

Svarthöfði skrifar: Veit Guðrún Hafsteinsdóttir hvort hún er að koma eða fara?
EyjanFastir pennar
Fyrir 3 vikum

Sigmundur Ernir skrifar: Ísrael hefur sagt sig úr samfélagi siðaðra þjóða

Sigmundur Ernir skrifar: Ísrael hefur sagt sig úr samfélagi siðaðra þjóða
EyjanFastir pennar
Fyrir 4 vikum

Alþingi leyst úr gíslingu

Alþingi leyst úr gíslingu
EyjanFastir pennar
11.07.2025

Nína Richter skrifar: Júlí á Þingeyri

Nína Richter skrifar: Júlí á Þingeyri
EyjanFastir pennar
04.07.2025

Nína Richter skrifar: Óvinir!

Nína Richter skrifar: Óvinir!
EyjanFastir pennar
02.07.2025

Svarthöfði: Óhamingjusamur málþófsmaður í prívat hagsmunagæslu

Svarthöfði: Óhamingjusamur málþófsmaður í prívat hagsmunagæslu