Heiða Björg Hilmisdóttir oddviti Samfylkingarinnar í borgarstjórn Reykjavíkur hefur loks tjáð sig um þá ákvörðun Einars Þorsteinssonar borgarstjóra og oddvita Framsóknarflokksins um að slíta meirihlutasamstarfi flokkanna tveggja og Pírata og Viðreisnar. Í færslu á Facebook síðu sinni segir Heiða Björg að ákvörðun Einars hafi einfaldlega komið eins og þruma úr heiðskíru lofti:
„Kæru vinir. Einhliða ákvörðun Einars Þorsteinssonar um slit á samstarfssáttmála Samfylkingarinnar, Viðreisnar, Pírata og Framsóknarflokks kom eins og þruma úr heiðskíru lofti. Ekkert í samstarfinu gaf tilefni til þessa, engar kröfur eða samtöl hafa farið fram innan meirihlutans um mikilvægi þess að breyta um kúrs fram að þessu.“
Heiða Björg segir ákvörðun Einars afar slæma og setja allt í borginni í uppnám:
„Ákvörðun Einars er vonbrigði enda var meirihlutasamstarfið farsælt og mörg mikilvæg verkefni í fullum gangi þar sem við vinnum að heilum hug fyrir hag borgarbúa. Óvissa um stefnu og rekstur Reykjavíkurborgar er hættuspil sem og kúvendingar í mikilvægum málaflokkum þegar svo langt er liðið á kjörtímabilið.“
Einar hefur hafið viðræður um myndun nýs meirihluta með Sjálfstæðisflokknum, Viðreisn og Flokki fólksins. Heiða Björg segir blasa við að um hannaða atburðarás sé að ræða:
„Ég trúi því ekki fyrr en ég sé það gerast að meirihluti borgarfulltrúa muni blessa þessa hönnuðu atburðarás sem nú er hafin og virðist hafa það helst að markmiði að koma Sjalfstæðisflokknum til valda á ný. Við í Samfylkingunni viljum halda áfram á réttri leið og vinnum að því öllum árum. Borgin okkar á betra skilið.“
