Fjármálaeftirlitið hefur ekkert gert til að tryggja að bankar fari eftir hæstaréttardómi frá 2017, sem kveður á um að lánaskilmálar bankanna um heimild þeirra til að hækka vexti á m.a. fasteignalánum. Fimm ár eru síðan Neytendasamtökin sendu eftirlitinu fyrirspurn vegna þessa en engin svör hafa borist enn. Þögnin er ærandi. Breki Karlsson, formaður Neytendasamtakanna, er gestur Ólafs Arnarsonar í hlaðvarpi Markaðarins á Eyjunni.

Hlýða má á brot úr þættinum hér:

Markaðurinn - Breki Karlsson - 3.mp4

Sú neytendavernd sem við búum við í dag hér á landi, þetta var ekki fundið upp hér á Íslandi, eins og þú segir, það þurfti að flytja þetta inn. Við fengum þetta með EES-samningnum.

„Algerlega. Það er 1993 sem í fyrsta skipti eru sett samkeppnislög, sett neytendalög, alvöru vernd fyrir neytendur kemur í fyrsta skipti þarna og það er alveg magnað að það hafi þurft til en að sama skapi frábært að það hafi gerst,“ segir Breki.

Hann segir að í vaxtamálinu sé m.a. byggt á hæstaréttardómi. „Það féll hæstaréttardómur 2017 sem dæmdi þessa vaxtaskilmála ólöglega og það er áfellisdómur yfir Fjármálaeftirlitinu að hafa ekki í kjölfar þessa hæstaréttardóms, sem féll 2017, og við reyndar sendum inn fyrirspurn 2019 til Fjármálaeftirlitsins og höfum ekki fengið svör enn þá um það hvað eftirlitið ætlaði sér að gera í öllum hinum málunum þar sem þessir skilmálar væru líka, sem Hæstiréttur var búinn að dæma ólöglega. En þögnin er ærandi þar.“

Breki greinir frá því að Neytendasamtökin séu líka að láta gera úttekt á tryggingamálum á Íslandi. „Þórólfur Matthíasson er að leiða þá vinnu að skoða af hverju tryggingar á Íslandi séu svona dýrar. Við erum búin að fá fyrstu áfangaskýrsluna og liggjum yfir henni og svo erum við að taka ákvörðun um næstu skref og við vonumst til að skýrslan muni liggja fyrir síðla vetrar. Þá getum við tekið upplýsta umræðu um það hvað við viljum gera eða hvort við viljum hugsanlega hafa tryggingar á Íslandi svona dýrar.“

Hægt er að hlusta á hlaðvarpið í heild sinni hér: