Katrín Jakobsdóttir forsætisráðherra ræddi við RÚV og svaraði spurningum um hvort hún hyggðist bjóða sig fram í komandi forsetakosningum. Hún segist vera að íhuga það alvarlega að bjóða sig fram og muni taka ákvörðun og tilkynna um hana á allra næstu dögum.

Katrín segir við RÚV að undanfarna daga hafi hún fyrst farið að íhuga framboð af einhverri alvöru, einna helst vegna hvatningar frá mörgu fólki víða um land.

Hún hafi upplýst formenn Sjálfstæðisflokksins og Framsóknarflokksins, samstarfsflokka flokks hennar, Vinstri Grænna, í ríkisstjórninni um að hún sé að íhuga það að bjóða sig fram. Katrín gefur lítið upp um þessi samtöl en þingflokkur Sjálfstæðisflokksins hefur verið boðaður til fundar til að ræða viðbrögð við hugsanlegu forsetaframboði hennar og formaður flokksins Bjarni Benediktsson utanríkisráðherra verður ekki viðstaddur afmælisfund utanríkisráðherra aðildarríkja Atlantshafsbandalagsins, sem nú stendur yfir í Brussel, eins og áður hafði verið tilkynnt. Ekki hefur verið gefið upp hvort fjarvera hans tengist framboðshugleiðingum Katrínar.

Þingflokkur Framsóknarflokksins mun einnig funda í dag sem og þingflokkur Vinstri Grænna þar sem Katrín mun ræða hugsanlegt forsetaframboð sitt við þingflokkinn.

Ljóst er því að óvissan er nokkur um hvert framhald stjórnarsamstarfsins verður láti Katrín slag standa og stefni til Bessastaða. Líklegt verður að teljast að niðurstaða þingflokksfunda hennar flokks og hinna flokkanna muni hafa talsvert að segja um hvort af framboði hennar til forseta verður.