En hann stendur frammi fyrir miklum vanda vegna allra þeirra ákæra og málshöfðana sem hann þarf að verjast þessi misserin og nú þegar hefur hann verið dæmdur til að greiða sektir og bætur upp á sem svarar til um 70 milljarða íslenskra króna.
Margir hafa því spurt sig hvort það stefni í gjaldþrot Trump. Að mati erlendra fjölmiðla þá er staðan ekki svo slæm nú en ljóst er að Trump er í ákveðnum lausafjárvanda. Það er ein af ástæðunum fyrir að hann hefur nú farið þá óvenjulegu leið að selja íþróttaskó sem heita „The Never Surrender High-Tops“. Nafnið vísar til þess að hann og stuðningsfólk hans muni aldrei gefast upp. Parið kostar litla 400 dollara en það svarar til um 55.000 króna.
Það eru 1.000 pör í boði og eru að minnsta kosti 10 þeirra með eiginhandaráritun Trump. Þegar Trump kynnti skóna á ráðstefnu í Philadelphia um helgina greiddi maður einn sem svarar til 1,2 milljóna íslenskra króna fyrir par með eiginhandaráritun Trump.
En skósalan dugir ekki ein og sér til að standa undir sektargreiðslum. Dómstóll í New York dæmdi hann í síðustu viku til að greiða 355 milljónir dollara í sekt og með vöxtum er reiknað með að upphæðin verði 450 milljónir dollara. Þetta svarar til um 60 milljarða króna. Í janúar var hann dæmdur til að greiða E. Jean Carroll, rithöfundi, sem svarar til 10 milljarða króna í miskabætur.
The Forbes segir að eignir Trump séu um 2,6 milljarðar dollara en aðeins örlítill hluti þeirra er í reiðufé. Í úttekt sem New York Times gerði á fjárhagsstöðu Trump á síðasta ári, þá átti hann um 350 milljónir dollara í reiðufé. Trump segist sjálfur eiga um 400 milljónir í reiðufé.
Hvað sem því líður, þá er ljóst að Trump mun eiga erfitt með að greiða sektina og bæturnar en það stefnir þó ekki í gjaldþrot. Hann á rúmlega 500 fyrirtæki en gæti neyðst til að selja úr eignasafninu til að geta greitt sektir og bætur.
Þetta getur komið sér illa fyrir hann því virði eigna hans mun lækka þegar kaupendur vita að hann neyðist til að selja. Síðan þarf að selja eignirnar með hraði og það gerir að verkum að erfiðara verður að semja um gott söluverð.
Trump hefur eins og venjulega ekki legið á skoðunum sínum og segir nýja dóminn vera hneyksli og sakar dómarana um að vera spillta og láta pólitík ráða för. Hann segist ætla að áfrýja dómnum.
Þegar hann áfrýjar honum hefur hann 30 daga til sanna að hann eigi peninga til að greiða sektina eða til að finna sjálfstætt fyrirtæki sem er reiðubúið til að setja fram tryggingu fyrir greiðslunni. New York Times segir að lögmenn Trump séu nú þegar á höttunum eftir fyrirtæki sem er tilbúið til að leggja þessa tryggingu fram.
