Jóhann Páll Jóhannsson þingmaður Samfylkingarinnar segir suma flokka tala fyrir og hugsa í lausnum um hvernig gera megi Ísland betra, en aðra flokka fyrst og fremst upptekna við að hræða kjósendur og afbaka stefnumál annarra flokka.
„Sumir stjórnmálaflokkar tala fyrir lausnum og eru með hugann við það hvernig megi gera Ísland að betri stað til að búa á. Aðrir virðast fyrst og fremst uppteknir við að hræða kjósendur og afbaka stefnumál annarra flokka,“
segir Jóhann Páll í færslu á Facebook-síðu sinni þar sem hann svarar aðsendri grein Áslaugu Örnu Sigurbjörnsdóttur, háskóla-, iðnaðar- og nýsköpunarráðherra, sem birtist í Morgunblaðinu í dag.
Sjá einnig: Áslaug Arna hjólar í „stóra plan Samfylkingarinnar“
Segir Jóhann Páll ljóst af lestri Morgunblaðsins „að Sjálfstæðisflokkurinn er að fara á taugum í vörn sinni fyrir hagsmuni ríkasta fólksins á Íslandi. Þau mega ekki til þess hugsa að fjársterkustu hóparnir greiði sama hlutfall tekna sinna í skatt og millistéttin. Í þessu áróðursstríði reyna þau að nota pípara, smiði og hárgreiðslufólk sem skjöld.“
Jóhann Páll segir fyrirtækjaskatt og fjármagnstekjuskatt hafa hækkað á einyrkja og smærri fyrirtæki á vakt núverandi ríkisstjórnar. „Það sem hefur þó fyrst og fremst grafið undan rekstrarumhverfi þeirra er óstjórnin í efnahagsmálum, ófyrirsjáanleiki, hringl og viðstöðulaus hallarekstur sem á sinn þátt í því að við búum nú við einhverja hæstu stýrivexti á byggðu bóli.
Forgangsmál Samfylkingarinnar er að lækka kostnað heimila og fyrirtækja með því að ná stjórn á fjármálum ríkisins. Við erum með plan til þess. Planið snýst um tiltekt í ríkisrekstri og breytingar á lögum um opinber fjármál til að skapa aukna festu við fjármálastjórnina. En við ætlum líka að tryggja jafnræði í skattheimtu og sjá til þess að allra hæstu tekjurnar beri sömu skattprósentuna óháð því hvort þær eru teknar út sem arður eða laun. Eins og fram hefur komið verður útfærslan með þeim hætti að skattbyrðin breytist ekki á tekjur undir 1,3 milljónum á mánuði. Þetta er jafnræðismál og í samræmi við sjónarmið sem fram hafa komið í greiningum Alþjóðagjaldeyrissjóðsins, fjármálaráðuneytisins og Alþýðusambands Íslands.
Í dag er hæsta skatthlutfall launa 52,4% yfir 1,3 milljónum á mánuði en virk skattlagning arðs er 37,6%. Þetta skapar verulegt skattahagræði fyrir aðila með miklar fjármagnstekjur og það er skattagatið sem Samfylkingin ætlar að loka. Um leið verður frítekjumörkum beitt til þess að tryggja að skattbyrði millitekjuhópa haldist óbreytt – enda snýst plan Samfylkingarinnar um að lækka kostnað heimila og fyrirtækja.“
